اتوار 04 دسمبر 2022 - 3:39:29 صبح

وام اور عمان نیوزایجنسی میں میڈیا تعاون کا معاہدہ


مسقط، 28 ستمبر، 2022 (وام) ۔۔ صدر عزت مآب شیخ محمد بن زاید آل نھیان کے سلطنت عمان کے دو روزہ سرکاری دورے کے دوران امارات نیوز ایجنسی (وام) کے وفد نے عمان نیوز ایجنسی (او این اے) کے ساتھ میڈیا تعاون کے معاہدے پر دستخط کیے ہیں۔

معاہدے کا مقصد خبروں کے تبادلے اور دونوں اداروں کے ملازمین کے لیے صلاحیت میں اضافے کے لیے تربیتی پروگرامز کے انعقاد میں تعاون کو مضبوط بنانا ہے۔

معاہدے پر دستخط وام کی ذرائع ابلاغ کے بین الاقوامی اداروں کے ساتھ شراکت داری کو مستحکم بنانااور پیشہ ورانہ تعاون کا پائیدار ماڈل بنانے کی کوششوں کا حصہ ہے جس سے اس کی ایک عالمی شہرت یافتہ کثیر لسانی میڈیا اور نیوز آؤٹ لیٹ کے طور پر حیثیت مزید مستحکم ہوگی۔

وام کے ڈائریکٹر جنرل محمد جلال الریسی اور او این اے کے ڈائریکٹر جنرل اور ایڈیٹر انچیف ابراہیم العزری نے دستخط کیے،معاہدے کے تحت دونوں اداروں کے درمیان میڈیا تعاون کو مضبوط بناتے ہوئے عربی اور انگریزی دونوں زبانوں میں روزانہ کی خبروں اور میڈیا مواد کے ساتھ ساتھ تصاویر اور ویڈیوز کا تبادلہ کیا جائے گا۔

یہ معاہدہ دونوں ممالک کے درمیان قریبی تعلقات کے ساتھ ساتھ ذرائع ابلاغ کے مختلف اداروں کے ساتھ تعاون کا ایک جدید ماڈل قائم کرنے کے لیے وام کی خواہش کو بھی اجاگر کرتا ہے، خاص طور پر ایسے موقع پر جب یو اے ای ابوظہبی میں 15 سے 17 نومبر تک گلوبل میڈیا کانگریس کے انعقاد کی تیاریاں کر رہا ہے۔

اس موقع پر الریسی نے کہا کہ متحدہ عرب امارات اور عمان کے درمیان گہرے تعلقات ہیں، جو دونوں ممالک کی قیادت کی حمایت کی وجہ سے اسٹریٹجک ترقی کررہے ہیں۔

او این اے اورعمان کے دیگر میڈیا اداروں کو گلوبل میڈیا کانگریس میں شرکت کی دعوت دیتے ہوئےانہوں نے مزید کہا کہ یہ معاہدہ میڈیا تعاون کو فروغ دینے اور خیالات اور مہارتوں کے تبادلے میں مدد فراہم کرنے کے ساتھ ساتھ دونوں ممالک میں میڈیا کے شعبوں کی معاونت بھی کرے گا ۔

اس موقع پر العزری نے کہا کہ متحدہ عرب امارات اور عمان کے درمیان مشترکہ تاریخ اور قریبی تعلقات کی بنیاد پر ٹھوس اسٹریٹجک تعلقات قائم ہیں ،جنہیں دونوں ممالک کے سماجی، ثقافتی اور جغرافیائی لحاظ سے باہم مربوط تعلقات اور ان کی قیادتوں کی حمایت حاصل ہے۔

میڈیا کا ادارہ پائیدار ترقی کو فروغ دیتے ہوئے انسانی بھائی چارے، رواداری اور امن کے اصولوں کو فروغ دیتا ہے۔ انہوں نے عالمی میڈیا کانگریس میں شرکت کے لیے وام کی طرف سے او این اے کو دی جانے والی دعوت کا بھی خیرمقدم کرتے ہوئے کہا کہ وہ چاہتے ہیں کہ نومبر میں ہونے والا یہ بین الاقوامی ایونٹ عالمی میڈیا کے شعبے کے مستقبل کی تشکیل نو کے اپنے ہدف کو حاصل کرے۔

ترجمہ۔ تنویر ملک

http://wam.ae/en/details/1395303087734

WAM/Urdu