ദുബായ്, 2024 ജനുവരി 21, (WAM) -- സാമ്പത്തിക കുറ്റകൃത്യങ്ങൾ പ്രതിരോധിക്കുന്നതിനായുള്ള ഓപ്പറേഷൻ സെന്റർ ഫോർ എക്കണോമിക് ക്രൈംസുമായി (ഒസിഇസി) പങ്കാളിത്തത്തിലേർപ്പെടുന്നതിന് ലോകത്തെ മുൻനിര ഡിജിറ്റൽ പേയ്മെന്റ് ദാതാവായ വിസ, ദുബായ് പോലീസുമായി ധാരണാപത്രം (എംഒയു) ഒപ്പുവെച്ചു.
തങ്ങളുടെ ദീർഘകാല പങ്കാളിത്തം ശക്തിപ്പെടുത്തുന്നതിനൊപ്പം തട്ടിപ്പിനെയും സാമ്പത്തിക കുറ്റകൃത്യങ്ങളെയും ചെറുക്കുന്നതിൽ ഇരു സംഘടനകളുടെയും പ്രതിബദ്ധത കരാർ അടിവരയിടുന്നു.
ദുബായ് പോലീസ് കമാൻഡർ-ഇൻ-ചീഫ് ലെഫ്റ്റനന്റ് ജനറൽ അബ്ദുല്ല ഖലീഫ അൽ മറിയും സിഇഎംഇഎ, വിസ റീജിയണൽ റിസ്ക് ഓഫീസർ ചാൾസ് ലോബോയും ധാരണാപത്രത്തിൽ ഒപ്പുവെച്ചു.
ഇത്തരം കുറ്റകൃത്യങ്ങളെ നിർണ്ണായകമായി നേരിടാനുള്ള ദുബായ് പോലീസിന്റെ പ്രതിബദ്ധത ദുബായ് പോലീസ് കമാൻഡർ-ഇൻ-ചീഫ് സ്ഥിരീകരിച്ചു, സാമ്പത്തിക കുറ്റകൃത്യങ്ങളെ ചെറുക്കാൻ യുഎഇ ഗണ്യമായ ശ്രമങ്ങൾ നടത്തിയിട്ടുണ്ടെന്നും അദ്ദേഹം ചൂണ്ടിക്കാട്ടി.
തട്ടിപ്പിനും സൈബർ കുറ്റകൃത്യങ്ങൾക്കുമെതിരായ സംയുക്ത ശ്രമങ്ങൾ, പ്രോജക്ടുകൾ, സംരംഭങ്ങൾ എന്നിവയിലെ ഒരു ചുവടുവെപ്പാണ് ധാരണാപത്രം പ്രതിനിധീകരിക്കുന്നതെന്ന് അദ്ദേഹം വിശദീകരിച്ചു.
“ഇന്നത്തെ ഡിജിറ്റൽ-ഫസ്റ്റ് ലോകത്ത്, സംശയം തോന്നാത്ത രീതിയിൽ ഉപഭോക്താക്കളെ കബളിപ്പിക്കാൻ കുറ്റവാളികൾ പുതിയ സമീപനങ്ങൾ ഉപയോഗിക്കുന്നതിനാൽ അഴിമതികൾ സങ്കീർണ്ണമായി വികസിച്ചുകൊണ്ടിരിക്കുന്നു. ഞങ്ങളുടെ സമീപകാല സ്റ്റേ സെക്യുർ പഠനം പ്രകാരം, യുഎഇയിലെ 61 ശതമാനം ഉപഭോക്താക്കളും തട്ടിപ്പ് വിദഗ്ധരാണെന്ന് അവകാശപ്പെടുമ്പോൾ, അവരിൽ 90 ശതമാനം പേരും തട്ടിപ്പ് മുന്നറിയിപ്പുകൾ വിട്ടുപോകാൻ സാധ്യതയുണ്ട്. മാത്രമല്ല, 77 ശതമാനം ഉപഭോക്താക്കളും തട്ടിപ്പുകാരിൽ നിന്നുള്ള തിരിച്ചറിയാൻ കഴിയാത്ത സന്ദേശങ്ങളോട് പ്രതികരിക്കാനും സാധ്യതയുണ്ട്." വിസ സീനിയർ വൈസ് പ്രസിഡന്റും ജിസിസി ഗ്രൂപ്പ് കൺട്രി മാനേജരുമായ ഡോ. സഈദ ജാഫർ അഭിപ്രായപ്പെട്ടു.
“സാമ്പത്തിക കുറ്റകൃത്യങ്ങൾക്കെതിരായ പോരാട്ടത്തിൽ ഒസിഇസി ഒരു നിർണായക സംരംഭമാണ്. ഉപഭോക്താക്കളെയും ബിസിനസുകളെയും വിശാലമായ പേയ്മെന്റ് ആവാസവ്യവസ്ഥയെയും മികച്ച രീതിയിൽ സംരക്ഷിക്കുന്നതിന് ഞങ്ങളുടെ പൊതു, സ്വകാര്യ മേഖലാ പങ്കാളികളുമായുള്ള സഹകരണം വർദ്ധിപ്പിക്കുന്നതിനുള്ള വിസയുടെ പ്രതിബദ്ധത ഈ കരാർ നിറവേറ്റുന്നു. ഈ അതുല്യമായ സംരംഭത്തിലും ദുബായ് പോലീസുമായുള്ള ഞങ്ങളുടെ ദീർഘകാല പങ്കാളിത്തത്തിലും വിസ അഭിമാനിക്കുന്നു, ഭാവിയിൽ കൂടുതൽ സഹകരണ അവസരങ്ങൾക്കായി ഞങ്ങൾ പ്രതീക്ഷിക്കുന്നു." ഡോ. സഈദ ജാഫർ വ്യക്തമാക്കി.
കരാറിലെ വ്യവസ്ഥകൾ പ്രകാരം, ഒസിഇസിയുടെ ലക്ഷ്യങ്ങൾ, ഘടന, പ്രക്രിയകൾ എന്നിവ സ്ഥാപിക്കാനും വിജ്ഞാന കൈമാറ്റം സംഘടിപ്പിക്കാനും പേയ്മെന്റ് സുരക്ഷയും സാമ്പത്തിക കുറ്റകൃത്യങ്ങളും സംബന്ധിച്ച പരിശീലനവും വർക്ക്ഷോപ്പുകളും നടത്താനും പ്രാഥമിക മീറ്റിംഗുകളിൽ പങ്കെടുക്കാനും പൈലറ്റ്, കൺസെപ്റ്റ് വാലിഡേഷൻ, തത്സമയ അന്വേഷണ കേസുകളിൽ സഹകരിക്കാനും വിസ സഹായിക്കും.
സാമ്പത്തിക കുറ്റകൃത്യങ്ങളിൽ നിന്ന് രാജ്യത്തെ നിവാസികളെയും ബിസിനസുകളെയും പ്രാദേശിക കമ്മ്യൂണിറ്റികളെയും സംരക്ഷിക്കുന്നതിനുള്ള നൂതന രീതികളും അത്യാധുനിക സാങ്കേതികവിദ്യയും പ്രയോജനപ്പെടുത്തുന്ന ഒരു നൂതന സംരംഭമാണ് ദുബായ് പോലീസ് ആസ്ഥാനത്ത് സ്ഥിതി ചെയ്യുന്ന ഒസിഇസി.