അബുദാബി, 6 ഫെബ്രുവരി 2024 (WAM) --മനുഷ്യർ തമ്മിലുള്ള ബന്ധങ്ങൾ അറ്റുപോകുന്ന ഈ കാലത്ത് സാഹോദര്യത്തെ പിന്തുണയ്ക്കുന്നതിൽ ഫ്രാൻസിസ് മാർപാപ്പയുടെയും, യുഎഇ രാഷ്ട്രപതിയുടെയും ശ്രമങ്ങൾ അഭിനന്ദനാർഹമാണെന്ന് അൽ-അസ്ഹറിലെ ഗ്രാൻഡ് ഇമാമും മുസ്ലീം കൗൺസിൽ ഓഫ് എൽഡേഴ്സിൻ്റെ ചെയർമാനുമായ ഡോ. അഹമ്മദ് അൽ-തയെബ് പറഞ്ഞു. മനുഷ്യ സാഹോദര്യത്തെക്കുറിച്ചുള്ള അബുദാബി ഡോക്യുമെൻ്റ് ഒപ്പുവെച്ചത്തിന്റെ അഞ്ചാം വാർഷികത്തോട് അനുബന്ധിച്ച് നടന്ന ചടങ്ങിൽ സംസാരിക്കുകയായിരുന്നു അദ്ദേഹം.
"ഈ തത്വങ്ങളിൽ ഏറ്റവും പ്രധാനം യുദ്ധങ്ങളും സംഘർഷങ്ങളും അവസാനിപ്പിക്കാനുള്ള ആഹ്വാനമാണ്. ഇത്തരം സാഹചര്യങ്ങൾ നിലനിൽക്കുന്നത് മനുഷ്യ സാഹോദര്യത്തിൻ്റെ മൂല്യങ്ങൾ പ്രചരിപ്പിക്കുന്നതിനും ശക്തിപ്പെടുത്തുന്നതിനുമുള്ള ഞങ്ങളുടെ ശ്രമങ്ങൾ തുടരാൻ ഞങ്ങളെ നിർബന്ധിതരാക്കുന്നു," അദ്ദേഹം കൂട്ടിച്ചേർത്തു.
ഈ ചരിത്ര രേഖയുടെ അഞ്ചാം വാർഷികം ലോകം ഇപ്പോൾ അഭിമുഖീകരിക്കുന്ന പോരാട്ടങ്ങളുടെയും യുദ്ധങ്ങളുടെയും കാലഘട്ടത്തിലാണ് എന്ന വസ്തുതയിൽ അദ്ദേഹം ഖേദം പ്രകടിപ്പിച്ചു. യുഎഇയിലെ സഹിഷ്ണുത, സഹവർത്തിത്വ മന്ത്രാലയം, അബ്രഹാമിക് ഫാമിലി ഹൗസ്, ഹയർ കമ്മറ്റി ഓഫ് ഹ്യൂമൻ ഫ്രറ്റേണിറ്റി എന്നിവയുടെ സഹകരണത്തോടെ മുസ്ലീം കൗൺസിൽ ഓഫ് എൽഡേഴ്സ് ആദ്യമായി സംഘടിപ്പിച്ച ഹ്യൂമൻ ഫ്രറ്റേണിറ്റി മജ്ലിസിൽ നടത്തിയ പ്രഭാഷണത്തിനിടെയാണ് അദ്ദേഹം ഇതു സംബന്ധിച്ച് പ്രസ്താവന നടത്തിയത്.
“ഞങ്ങളുടെ സഹോദരങ്ങളെയും സഹോദരിമാരെയും കുട്ടികളെയും അവർ അനുഭവിക്കുന്ന അടിച്ചമർത്തലിൽ നിന്ന് രക്ഷിക്കാൻ പ്രവർത്തിക്കുന്നത് തുടരാൻ ഇത് ഞങ്ങളെ നിർബന്ധിക്കുന്നു, അവരുടെ രക്തം അനുദിനം വിലകുറഞ്ഞ രീതിയിൽ ചൊരിയുന്നു,” അദ്ദേഹം പറഞ്ഞു.
ഡോക്യുമെൻ്റ് ഓൺ ഹ്യൂമൻ ഫ്രറ്റേണിറ്റിയുടെ സമാരംഭം മുതൽ അതിൻ്റെ രക്ഷാധികാരിയായ രാഷ്ട്രപതി ശൈഖ് മുഹമ്മദ് ബിൻ സായിദ് അൽ നഹ്യാനോടും ഗ്രാൻഡ് ഇമാം നന്ദി രേഖപ്പെടുത്തി. ഈ പിന്തുണ, മനുഷ്യ മനസ്സാക്ഷിയോടും, നന്മയോടുള്ള സ്നേഹത്തോടും, അത് വാഗ്ദാനം ചെയ്യുന്നവരോടും, നിശബ്ദതയിലും അർപ്പണബോധത്തിലും നിസ്വാർത്ഥതയിലും പ്രവർത്തിക്കുന്ന മഹത്തായ ആളുകളെ കണ്ടെത്തുന്നതിന് പ്രാപ്തമാക്കിയതായി അദ്ദേഹം അഭിപ്രായപ്പെട്ടു. "പലപ്പോഴും ശ്രദ്ധയിൽപ്പെടാത്ത ഈ വ്യക്തികൾ, അവരുടെ വംശമോ മതമോ പശ്ചാത്തലമോ പരിഗണിക്കാതെ, ലോകത്തിൻ്റെ വിവിധ ഭാഗങ്ങളിൽ ദരിദ്രരും ദുരിതമനുഭവിക്കുന്നവരുമായ മനുഷ്യരാശിക്ക് മഹത്തായ മാനുഷിക സേവനങ്ങൾ നൽകുന്നു," ഇമാം പറഞ്ഞു.
"നമ്മൾ ഒരുമിച്ച് ഒപ്പിട്ട മനുഷ്യ സാഹോദര്യത്തെക്കുറിച്ചുള്ള രേഖയിൽ ഒപ്പിട്ടതിൻ്റെ അഞ്ചാം വാർഷികം ഇന്ന് നിങ്ങളുമായി പങ്കിടുന്നതിൽ എനിക്ക് സന്തോഷമുണ്ട്. 2019 ഫെബ്രുവരി 4 മുതൽ, ഈ രേഖയെ പരിപാലിക്കുന്നതിലെ നിങ്ങളുടെ നിരന്തര സമർപ്പണത്തിനും ദരിദ്രരെ പിന്തുണയ്ക്കാനും അടിച്ചമർത്തപ്പെട്ടവർക്കും പീഡിപ്പിക്കപ്പെടുന്നവർക്കും വേണ്ടിയുള്ള നിങ്ങളുടെ പ്രശംസനീയമായ ശ്രമങ്ങൾക്കും ലോകം സാക്ഷ്യം വഹിക്കുന്നു," കത്തോലിക്കാ സഭയുടെ തലവൻ ഫ്രാൻസിസ് മാർപാപ്പയോട് നന്ദി രേഖപ്പെടുത്തി കൊണ്ട് അദ്ദേഹം പറഞ്ഞു.
മനുഷ്യ സാഹോദര്യത്തെക്കുറിച്ചുള്ള രേഖയിൽ ഒപ്പിട്ടതിൻ്റെ അഞ്ചാം വാർഷികത്തോട് അനുബന്ധിച്ച്
യുഎഇയിലെ സഹിഷ്ണുത, സഹവർത്തിത്വ മന്ത്രാലയം, അബ്രഹാമിക് ഫാമിലി ഹൗസ്, ഹയർ കമ്മറ്റി ഓഫ് ഹ്യൂമൻ ഫ്രറ്റേണിറ്റി എന്നിവയുടെ സഹകരണത്തോടെ മുസ്ലീം കൗൺസിൽ ഓഫ് എൽഡേഴ്സ് ആദ്യ ഹ്യൂമൻ ഫ്രറ്റേണിറ്റി മജ്ലിസ് സംഘടിപ്പിച്ചത്.
WAM/അമൃത രാധാകൃഷ്ണൻ