അബുദാബി, 29 ഫെബ്രുവരി 2024 (WAM) --കഴിഞ്ഞ വർഷം യുഎഇയിലെ വിമാനത്താവളങ്ങളിലെ യാത്രക്കാരുടെ എണ്ണം 134 ദശലക്ഷം കവിഞ്ഞതായും, ഈ വർഷം ഇത് 140 ദശലക്ഷത്തിൽ എത്തുമെന്നും പ്രതീക്ഷിക്കുന്നതായി ജനറൽ സിവിൽ ഏവിയേഷൻ അതോറിറ്റി (ജിസിഎഎ) ഡയറക്ടർ ജനറൽ സെയ്ഫ് മുഹമ്മദ് അൽ സുവൈദി അറിയിച്ചു.
ആഗോള തലത്തിൽ വിശ്വാസം നേടിയെടുത്ത യുഎഇ വ്യോമയാന മേഖലയുടെ കരുത്തും മത്സരക്ഷമതയുമാണ് ഈ നേട്ടത്തിന് കാരണമെന്ന് അദ്ദേഹം പറഞ്ഞു.
2023-ൽ യുഎഇ വിമാനത്താവളങ്ങളിൽ നിന്ന് ഏകദേശം 38 ദശലക്ഷം വരവുകളും 37.805 ദശലക്ഷം യാത്രകളും 58.328 ദശലക്ഷം ട്രാൻസിറ്റ് യാത്രക്കാരും രേഖപ്പെടുത്തിയതായി എമിറേറ്റ്സ് ന്യൂസ് ഏജൻസിക്ക് നൽകിയ പ്രസ്താവനയിൽ അൽ സുവൈദി എടുത്തുപറഞ്ഞു.
2024-ൽ യാത്രക്കാരുടെ എണ്ണത്തിൽ കൂടുതൽ വളർച്ച 140 ദശലക്ഷത്തിലെത്തുമെന്ന് ശുഭാപ്തിവിശ്വാസം പ്രകടിപ്പിച്ചുകൊണ്ട് അൽ സുവൈദി പറഞ്ഞു. അന്താരാഷ്ട്ര വിമാനത്താവളങ്ങളിൽ നടക്കുന്ന വിപുലീകരണങ്ങൾ, പ്രത്യേകിച്ച് സായിദ് ഇൻ്റർനാഷണൽ എയർപോർട്ട് - ടെർമിനൽ എ ഉദ്ഘാടനവും അൽ മക്തൂം ഇൻ്റർനാഷണൽ എയർപോർട്ടിൻ്റെ നിലവിലെ വിപുലീകരണവും അദ്ദേഹം പരാമർശിച്ചു. ഈ സംഭവവികാസങ്ങൾ വിവിധ ലക്ഷ്യസ്ഥാനങ്ങളിലേക്ക് കൂടുതൽ ഫ്ലൈറ്റുകൾ പ്രവർത്തിപ്പിക്കാൻ യുഎഇയെ പ്രാപ്തമാക്കുമെന്നും അദ്ദേഹം കൂട്ടിച്ചേർത്തു.
തദ്ദേശീയവും വിദേശവുമായ നിരവധി എയർക്രാഫ്റ്റ് മെയിൻ്റനൻസ് കമ്പനികൾ, പരിശീലന സ്ഥാപനങ്ങൾ, സിവിൽ ഏവിയേഷൻ നൽകുന്ന പ്രത്യേക മെഡിക്കൽ സൗകര്യങ്ങൾ എന്നിവയുടെ സാന്നിധ്യവും അൽ സുവൈദി അടിവരയിട്ടു.
അമച്വർമാർക്കായുള്ള ആളില്ലാ ആകാശ വാഹനങ്ങളെ (UAV) സംബന്ധിച്ച്, 22,000-ലധികം പേർ ജിസി യിൽ രജിസ്റ്റർ ചെയ്തിട്ടുണ്ട്, എന്നാൽ കൂടുതൽ അറിയിപ്പ് ഉണ്ടാകുന്നത് വരെ ജിസിഎഎ അവയുടെ പ്രവർത്തനം താൽക്കാലികമായി നിർത്തിവച്ചിരിക്കുന്നതായും അദ്ദേഹം അറിയിച്ചു.
എയർസ്പേസ് മാനേജ്മെൻ്റ് മെച്ചപ്പെടുത്തുന്നതിലും സുഗമമായ എയർ ട്രാഫിക് ഫ്ലോ ഉറപ്പാക്കുന്നതിലും ശ്രദ്ധ കേന്ദ്രീകരിച്ച ഭാവി പദ്ധതികൾ അൽ സുവൈദി വിശദീകരിച്ചു. അടുത്ത ദശകത്തിൽ ശൈഖ് സായിദ് എയർ നാവിഗേഷൻ സെൻ്ററിലെ സേവനങ്ങൾ നവീകരിക്കാൻ 700 മില്യണിലധികം ദിർഹം അനുവദിച്ചതായും അദ്ദേഹം കൂട്ടിച്ചേർത്തു.
വ്യോമയാന മേഖലയുടെ സാമ്പത്തികവും പ്രവർത്തനപരവുമായ വികസനം നേരിട്ട് പ്രോത്സാഹിപ്പിക്കുന്നതിന് ലക്ഷ്യമിട്ടുള്ള വിവിധ പരിവർത്തന പദ്ധതികളും സംരംഭങ്ങളും അതോറിറ്റി സജീവമായി നടപ്പാക്കുന്നുണ്ടെന്ന് അദ്ദേഹം സൂചിപ്പിച്ചു.
WAM/അമൃത രാധാകൃഷ്ണൻ