അബുദാബി, 2024 ഏപ്രിൽ 10, (WAM) -- ബേർഡ്സ് ഓഫ് ഗുഡ്നെസിന്റെ ഭാഗമായി നടത്തിയ 30-ാമത് എയർഡ്രോപ്പ് ഓപ്പറേഷനിലൂടെ 125 ടൺ മാനുഷിക സഹായവും ഈദ് വസ്ത്രങ്ങളും വടക്കൻ ഗാസയിൽ വിതരണം ചെയ്തതായി പ്രതിരോധ മന്ത്രാലയത്തിൻ്റെ ജോയിൻ്റ് ഓപ്പറേഷൻസ് കമാൻഡ് പ്രഖ്യാപിച്ചു. ഇതുവരെ നടത്തിയതിൽ ഏറ്റവും വലിയ എയർഡ്രോപ്പിൽ യുഎഇ വ്യോമസേനയുടെ മൂന്ന് സി -17, രണ്ട് സി -295, ഈജിപ്ഷ്യൻ വ്യോമസേനയുടെ ഒരു സി -130 എന്നിങ്ങനെ മൊത്തം ആറ് സൈനിക വിമാനങ്ങളുടെ സഹായത്തോടെയാണ് 2024 ഏപ്രിൽ 10-ന് എയർഡ്രോപ്പ് നിർവ്വഹിച്ചത്.
എയർഡ്രോപ്പ് ചെയ്ത സഹായ സാമഗ്രികകളിൽ എല്ലാ കുടുംബാംഗങ്ങൾക്കുമുള്ള വസ്ത്രങ്ങൾ, കളിപ്പാട്ടങ്ങൾ, മധുരപലഹാരങ്ങൾ, വിവിധ ഉൽപ്പന്നങ്ങൾ എന്നിവ ഉൾപ്പെടുന്നു. ഈദ് അൽ ഫിത്വർ വേളയിൽ ഗാസയിലെ പലസ്തീൻ ജനതയുടെ ആവശ്യങ്ങൾ അഭിസംബോധന ചെയ്യുക, അവരുടെ പ്രയാസങ്ങൾ ലഘൂകരിക്കുന്നതിനൊപ്പം പ്രതീക്ഷയും സന്തോഷവും വളർത്തുക എന്നതാണ് ദൗത്യത്തിൻ്റെ ലക്ഷ്യം.
കരമാർഗം എത്തിച്ചേരാൻ പ്രയാസമുള്ള വടക്കൻ ഗാസയിലെ ഒറ്റപ്പെട്ട പ്രദേശങ്ങളെ ലക്ഷ്യമിട്ടായിരുന്നു പ്രവർത്തനം. "ബേർഡ്സ് ഓഫ് ഗുഡ്നെസ്" ആരംഭിച്ചതിന് ശേഷം വിതരണം ചെയ്ത മൊത്തം സഹായത്തിൻ്റെ അളവ് 1,857 ടൺ ഭക്ഷണ, ദുരിതാശ്വാസ സാമഗ്രികളിലെത്തി.
കെരെം ഷാലോം ക്രോസിംഗിലൂടെയുള്ള കര കയറ്റുമതിയും “ബേർഡ്സ് ഓഫ് ഗുഡ്നെസ്” വഴിയുള്ള എയർഡ്രോപ്പുകളും ഉൾപ്പെടെ, ഇത് വടക്കൻ ഗാസയിലേക്ക് യുഎഇ അയച്ച മൊത്തം സഹായത്തിൻ്റെ അളവ് 2,227 ടണ്ണിലേക്ക് എത്തിക്കുന്നു.
ഗാസയിലെ പലസ്തീൻ ജനതയെ പിന്തുണയ്ക്കുന്നതിനുള്ള ഓപ്പറേഷൻ "ഷിവൽറസ് നൈറ്റ് 3" ൻ്റെ ഭാഗമാണ് "ബേർഡ്സ് ഓഫ് ഗുഡ്നെസ്" ക്യാമ്പയിൻ.