ദുബായ്, 7 മെയ്, 2024 (WAM) -സാമ്പത്തിക മന്ത്രിയും എമിറേറ്റ്സ് ടൂറിസം കൗൺസിൽ ചെയർമാനുമായ അബ്ദുല്ല ബിൻ തൂഖ് അൽ മാരി ഇറ്റാലിയൻ മന്ത്രി ഡാനിയേല സാൻ്റഞ്ചെ, വേൾഡ് ട്രാവൽ ആൻഡ് ടൂറിസം കൗൺസിൽ പ്രസിഡൻ്റ് ജൂലിയ സിംപ്സൺ എന്നിവരുമായി സംയുക്ത ടൂറിസം സഹകരണം ചർച്ച ചെയ്തു.
മെയ് 6 മുതൽ 9 വരെ ദുബായിൽ നടക്കുന്ന അറേബ്യൻ ട്രാവൽ മാർക്കറ്റിൻ്റെ 31-ാമത് പതിപ്പിൽ അവർ പങ്കെടുത്തതിൻ്റെ ഭാഗമായിട്ടായിരുന്നു കൂടിക്കാഴ്ച്ച.
നിലവിലെ സാമ്പത്തിക പങ്കാളിത്തം പ്രയോജനപ്പെടുത്തി യുഎഇയും ഇറ്റലിയും തമ്മിലുള്ള ടൂറിസം സഹകരണം ശക്തിപ്പെടുത്തുന്നതിനുള്ള വഴികൾ ബിൻ തൂക്കും ഇറ്റാലിയൻ മന്ത്രിയും പര്യവേക്ഷണം ചെയ്തു. എമിറാറ്റി, ഇറ്റാലിയൻ ബിസിനസുകൾക്കായി ഹോസ്പിറ്റാലിറ്റി, വ്യോമയാനം, യാത്ര എന്നിവയിൽ പുതിയ നിക്ഷേപ അവസരങ്ങൾ സൃഷ്ടിക്കുന്നതിൽ അവരുടെ ചർച്ചകൾ ശ്രദ്ധ കേന്ദ്രീകരിച്ചു. കൂടാതെ, ഇരു രാജ്യങ്ങൾക്കുമിടയിൽ ടൂറിസ്റ്റ് പ്രതിനിധികളുടെ കൂടുതൽ കൈമാറ്റം പ്രോത്സാഹിപ്പിക്കുന്നതിനായി നൂതന വിനോദസഞ്ചാര, വിനോദ പരിപാടികളുടെ വികസനം യോഗം അവലോകനം ചെയ്തു.
വേൾഡ് ട്രാവൽ ആൻഡ് ടൂറിസം കൗൺസിൽ പ്രസിഡൻ്റ്/സിഇഒയുമായുള്ള കൂടിക്കാഴ്ചയിൽ, ആഗോളതലത്തിൽ ടൂറിസം മേഖലയിലെ ഏറ്റവും പുതിയ സംഭവവികാസങ്ങളെക്കുറിച്ചും ഈ സുപ്രധാന മേഖലയുടെ വളർച്ച വർദ്ധിപ്പിക്കുന്നതിനുള്ള ആധുനിക പ്രവണതകളെക്കുറിച്ചും ആഗോള സമ്പദ്വ്യവസ്ഥയുടെ ജിഡിപിയിൽ മേഖലയുടെ സംഭാവന ശക്തിപ്പെടുത്തുന്നതിനെക്കുറിച്ചും യോഗം വിശകലനം ചെയ്തു. സുസ്ഥിര ടൂറിസം നയങ്ങളെക്കുറിച്ചുള്ള വൈദഗ്ധ്യവും വിവരങ്ങളും കൈമാറേണ്ടതിൻ്റെ പ്രാധാന്യവും അവർ ചർച്ച ചെയ്തു.
WAM/അമൃത രാധാകൃഷ്ണൻ