അബുദാബി, 26 മെയ്, 2024 (WAM) --ദുബായ് രണ്ടാം ഡെപ്യൂട്ടി ഭരണാധികാരിയും ദുബായ് മീഡിയ കൗൺസിൽ ചെയർമാനുമായ ശൈഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മക്തൂമിൻ്റെ രക്ഷാകർതൃത്വത്തിലും സാന്നിധ്യത്തിലും അറബ് മീഡിയ സമ്മിറ്റ് 2024 തിങ്കളാഴ്ച ദുബായ് വേൾഡ് ട്രേഡ് സെൻ്ററിൽ ആരംഭിക്കും. മെയ് 27 മുതൽ 29 വരെ ദുബായ് പ്രസ് ക്ലബ് സംഘടിപ്പിക്കുന്ന പരിപാടിയിൽ 22-ാമത് അറബ് മീഡിയ ഫോറം, 23-ാമത് അറബ് മീഡിയ അവാർഡ് ദാന ചടങ്ങ്, നാലാമത് അറബ് സോഷ്യൽ മീഡിയ ഇൻഫ്ലുവൻസേഴ്സ് അവാർഡ് ചടങ്ങ് എന്നിവ ഫീച്ചർ ചെയ്യും.
ഫോറം പ്രമുഖ വ്യക്തികൾ, യുവ ഉള്ളടക്ക സ്രഷ്ടാക്കൾ, ഡിജിറ്റൽ സ്റ്റോറിടെല്ലർമാർ, ആഗോള മാധ്യമ വ്യവസായ പ്രമുഖർ എന്നിവരെ ഒരുമിച്ച് കൊണ്ടുവരും. മാധ്യമ, സർഗ്ഗാത്മക മേഖലകളിൽ നിന്നുള്ള ആയിരത്തിലധികം വിദ്യാർത്ഥികൾ ഫോറത്തിൽ പങ്കെടുക്കും.
അതിവേഗം മാറിക്കൊണ്ടിരിക്കുന്ന മാധ്യമ പരിതസ്ഥിതിയിൽ അഭിവൃദ്ധി പ്രാപിക്കാൻ ആവശ്യമായ വൈദഗ്ധ്യവും അറിവും ഉപയോഗിച്ച് അടുത്ത തലമുറയിലെ മാധ്യമ പ്രവർത്തകരെ സജ്ജരാക്കുക എന്നതാണ് പരിപാടിയുടെ ലക്ഷ്യം.
ബഹ്റൈനിലെ ദേശീയ സുരക്ഷാ ഉപദേഷ്ടാവും ഹ്യൂമാനിറ്റേറിയൻ അഫയേഴ്സ് ആൻഡ് യൂത്ത് അഫയേഴ്സ് പ്രതിനിധിയുമായ ശൈഖ് നാസർ ബിൻ ഹമദ് അൽ ഖലീഫ, യുഎഇ യുവജന സഹമന്ത്രി ഡോ. സുൽത്താൻ അൽനെയാദി, എന്നിവരും 'യുവജനങ്ങളുടെ അഭിലാഷങ്ങൾ' എന്ന തലക്കെട്ടിൽ പ്രധാന സെഷനിൽ സംസാരിക്കും.
പ്രാദേശിക വ്യവസായത്തിൻ്റെ വികസനത്തിന് കാര്യമായ സംഭാവനകൾ നൽകിയ എമിറാത്തി മീഡിയ പയനിയർമാരുടെ നേതൃത്വത്തിലുള്ള സെഷനുകൾ ഉൾപ്പെടുന്ന ദുബായ് മീഡിയ പയനിയേഴ്സ് പ്ലാറ്റ്ഫോമും ഫോറത്തിൻ്റെ സവിശേഷതയാണ്. ഈ സെഷനുകൾ യുവതലമുറയ്ക്ക് ഈ മേഖലയുടെ വികസനം ഉത്തേജിപ്പിക്കുന്നതിന് അറിവും അനുഭവവും നൽകുന്നതിന് ലക്ഷ്യമിടുന്നു.
പ്രമുഖ ആഗോള ഡിജിറ്റൽ പ്ലാറ്റ്ഫോമുകളുമായി സഹകരിച്ച്, അറബ് യൂത്ത് മീഡിയ ഫോറം എട്ട് മാസ്റ്റർക്ലാസ്സുകൾ സംഘടിപ്പിക്കും. ഇത് യുവ മാധ്യമ പ്രൊഫഷണലുകൾക്ക് അവരുടെ പ്രൊഫഷണൽ കഴിവുകൾ വികസിപ്പിക്കാനുള്ള വിലപ്പെട്ട അവസരം വാഗ്ദാനം ചെയ്യുന്നു. മെറ്റ, ടിക്ടോക്ക്, എക്സ്, യുട്യൂബ്, ലിങ്കഡ്ഇൻ, സ്നാപ് ചാറ്റ്, വിഎഫ്എക്സ്, മോജോ എന്നിവയുൾപ്പെടെയുള്ള പ്രമുഖ ആഗോള മാധ്യമ കമ്പനികളാണ് മാസ്റ്റർ ക്ലാസുകൾ സംഘടിപ്പിക്കുന്നത്.
WAM/അമൃത രാധാകൃഷ്ണൻ