ദോഹ, 30 മെയ്, 2024 (WAM) -- ദോഹയിൽ ഖത്തർ ആതിഥേയത്വം വഹിച്ച ജിസിസി ദേശീയ ഒളിമ്പിക് കമ്മിറ്റികളുടെ 36-ാമത് പ്രസിഡൻ്റുമാരുടെ യോഗത്തിൽ പങ്കെടുത്ത യുഎഇ പ്രതിനിധി സംഘത്തെ ദേശീയ ഒളിമ്പിക് കമ്മിറ്റി (എൻഒസി) വൈസ് പ്രസിഡൻ്റ് ശൈഖ് റാഷിദ് ബിൻ ഹുമൈദ് അൽ നുഐമി നയിച്ചു.
ജിസിസി പൗരന്മാർക്ക് കൂടുതൽ അവസരങ്ങൾ നൽകുന്നതിന് പ്രത്യേക കായിക കോഴ്സുകളും വർക്ക്ഷോപ്പുകളും വർദ്ധിപ്പിക്കണമെന്ന് ഗൾഫ് എൻഒസികളോട് ആവശ്യപ്പെട്ടു. ജനറൽ സെക്രട്ടേറിയറ്റിൽ നിന്നുള്ള നിരവധി ശുപാർശകൾ യോഗം അംഗീകരിച്ചു. ഒളിമ്പിക് കമ്മിറ്റികൾ 2025-ലേക്കുള്ള ഇവൻ്റുകളുടെയും കോഴ്സുകളുടെയും ഷെഡ്യൂളും, അടുത്ത വർഷത്തെ കായിക മത്സരങ്ങൾക്കായുള്ള ഫെഡറേഷനുകളുടെ പദ്ധതികളെക്കുറിച്ചുള്ള വിവരങ്ങളും ഈ വർഷം നവംബറോടെ ജനറൽ സെക്രട്ടേറിയറ്റിന് സമർപ്പിക്കും. പദ്ധതിയുടെ നടത്തിപ്പിന് മേൽനോട്ടം വഹിക്കുന്നതിനും സംയുക്ത ഗൾഫ് കായിക സംരംഭങ്ങൾ കൈകാര്യം ചെയ്യുന്നതിനുമായി അംഗരാജ്യങ്ങളിൽ നിന്നുള്ള പരിചയസമ്പന്നരും യോഗ്യതയുള്ളവരുമായ ഉദ്യോഗാർത്ഥികളെ ഉൾപ്പെടുത്തി ഒരു പ്ലാനിംഗ്, കോർഡിനേഷൻ, ഫോളോ-അപ്പ് കമ്മിറ്റി രൂപീകരിക്കാനും യോഗം ശുപാർശ ചെയ്തു.
പരിശീലന കോഴ്സുകളിലും അനുഭവ വിനിമയങ്ങളിലും ഭാവിയിലെ അന്താരാഷ്ട്ര സ്പോർട്സ് സഹകരണങ്ങൾ ശ്രദ്ധ കേന്ദ്രീകരിക്കണമെന്ന ശുപാർശയ്ക്കൊപ്പം അന്താരാഷ്ട്ര സഹകരണവും യോഗം ചർച്ച ചെയ്തു. പ്രാദേശിക, അന്തർദേശീയ കായിക മത്സരങ്ങളുടെ തിരക്ക് കണക്കിലെടുത്ത് 2024-ൽ സൗദി അറേബ്യയിൽ ആദ്യം നടത്താൻ നിശ്ചയിച്ചിരുന്ന ആദ്യ ജിസിസി ഫുട്സാൽ, ആയോധന കല ഗെയിംസ് റദ്ദാക്കുന്നതിന് യോഗം അംഗീകാരം നൽകി.2028 മുതൽ 2031 വരെയുള്ള ഗൾഫ് സ്പോർട്സ് കോഴ്സുകളുടെ ടൈംടേബിൾ ജനറൽ സെക്രട്ടേറിയറ്റിന് സമർപ്പിക്കുന്നതിന് പ്ലാനിംഗ്, കോർഡിനേഷൻ, ഫോളോ-അപ്പ് കമ്മിറ്റിയെ ചുമതലപ്പെടുത്തിയിട്ടുണ്ട്
WAM/അമൃത രാധാകൃഷ്ണൻ