അബുദാബി, 13 ജൂൺ 2024 (WAM) --യുഎഇ രാഷ്ട്രപതി ശൈഖ് മുഹമ്മദ് ബിൻ സായിദ് അൽ നഹ്യാൻ്റെ ഉത്തരവ് പ്രകാരം 2024-ൽ അബുദാബി നിവാസികൾക്ക് രണ്ടാമത്തെ ഭവന, ആനുകൂല്യ പാക്കേജ് വിതരണം ചെയ്യാൻ അബുദാബി കിരീടാവകാശിയും അബുദാബി എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ അനുമതി നൽകി. 3.309 ബില്യൺ ദിർഹം മൂല്യമുള്ള ഈ ആനുകൂല്യങ്ങൾ എമിറേറ്റിലെ 2,015 പൗരന്മാർക്ക് വിതരണം ചെയ്തു.
ബൽഗായ്ലാം റെസിഡൻഷ്യൽ പ്രോജക്റ്റിൽ അപ്പാർട്ട്മെൻ്റുകൾ വാങ്ങുന്നതിനുള്ള 782 ലോണുകൾ ഉൾപ്പെടെ 3.046 ബില്യൺ ദിർഹത്തിലധികം മൂല്യമുള്ള ഭവന വായ്പയുള്ള 1,766 താമസക്കാരെ ഭവന ആനുകൂല്യ പാക്കേജ് സഹായിക്കുന്നു.
കൂടാതെ, മുതിർന്ന പൗരന്മാർക്കും താഴ്ന്ന വരുമാനക്കാരായ വിരമിച്ചവർക്കും മരണമടഞ്ഞ പൗരന്മാരുടെ ബന്ധുക്കൾക്കുമായി 262.8 ദശലക്ഷം ദിർഹം ഭവന വായ്പാ പേയ്മെൻ്റുകൾ ഒഴിവാക്കി. എമിറേറ്റിലെ 249 താമസക്കാർ ഈ ഇളവിലൂടെ നേരിട്ട് ലാഭം നേടിയിട്ടുണ്ട്.
" 2024ൽ രണ്ടാമത്തെ ഭവന, ആനുകൂല്യ പാക്കേജ് വിതരണം ചെയ്യുന്നതിനുള്ള നിർദ്ദേശങ്ങൾ നൽകിയ യുഎഇ രാഷ്ട്രപതി ശൈഖ് മുഹമ്മദ് ബിൻ സായിദ് അൽ നഹ്യാനും അബുദാബി കിരീടാവകാശിയും അബുദാബി എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനും ഞങ്ങളുടെ അഗാധമായ നന്ദി അറിയിക്കുന്നു," അബുദാബി ഹൗസിംഗ് അതോറിറ്റിയുടെ ഡയറക്ടർ ബോർഡ് ചെയർമാൻ മുഹമ്മദ് അലി അൽ ഷൊറാഫ പറഞ്ഞു.
അബുദാബിയിലെ എല്ലാ പൗരന്മാർക്കും പാർപ്പിടം നൽകുന്നതിനുള്ള പ്രോഗ്രാമുകളും സേവനങ്ങളും തുടർച്ചയായി മെച്ചപ്പെടുത്തുന്നതിന് അബുദാബി ഹൗസിംഗ് അതോറിറ്റി പ്രതിജ്ഞാബദ്ധമാണെന്ന്, അദ്ദേഹം കൂട്ടിച്ചേർത്തു.
എമിറാത്തി കുടുംബങ്ങളുടെ ക്ഷേമം ഉറപ്പാക്കാനുള്ള നേതൃത്വത്തിൻ്റെ പ്രതിജ്ഞാബദ്ധത പ്രതിഫലിപ്പിക്കുന്ന ഈ പാക്കേജിൻ്റെ വിതരണം വരാനിരിക്കുന്ന ഈദ് അൽ അദ്ഹയോട് യോജിക്കുന്നു. അബുദാബി ഹൗസിംഗ് അതോറിറ്റി സ്ഥാപിതമായതിനുശേഷം വിതരണം ചെയ്ത ഭവന ആനുകൂല്യങ്ങളുടെ ആകെ മൂല്യം ഇതോടെ 152 ബില്യൺ ദിർഹത്തിൽ കൂടുതലായി.
WAM/അമൃത രാധാകൃഷ്ണൻ