അബുദാബി, 20 ജൂൺ 2024 (WAM) --അബുദാബിയുടെ ആഗോള ടെക് ഇക്കോസിസ്റ്റവും മിഡിൽ ഈസ്റ്റ് മേഖലയിലേക്ക് വ്യാപിപ്പിക്കുന്നതിനായി ലോകോത്തര അന്താരാഷ്ട്ര സ്റ്റാർട്ടപ്പുകളെ ആകർഷിക്കുന്നതിനുള്ള അതിൻ്റെ ശ്രമങ്ങളും പര്യവേക്ഷണം ചെയ്യുന്നതിനായി സഹിഷ്ണുത, സഹവർത്തിത്വ മന്ത്രി ശൈഖ് നഹ്യാൻ ബിൻ മുബാറക് അൽ നഹ്യാൻ ഹബ്ബ്71 സന്ദർശിച്ചു. സാമ്പത്തിക വൈവിധ്യവൽക്കരണത്തിൻ്റെയും സുസ്ഥിര വളർച്ചയുടെയും പ്രധാന ചാലകങ്ങളായി നവീകരണവും സംരംഭകത്വവും പ്രോത്സാഹിപ്പിക്കുന്നതിനുള്ള യുഎഇയുടെ പ്രതിബദ്ധത ഈ സന്ദർശനം അടിവരയിടുന്നു. എമിറേറ്റിൻ്റെ മുൻഗണനാ മേഖലകളായ ഫിൻടെക്, ക്ലൈമറ്റ്ടെക്, ഹെൽത്ത്ടെക്, എഡ്ടെക് എന്നിവയുമായി യോജിച്ച് പ്രവർത്തിക്കുന്ന മേഖലകളിൽ അബുദാബിയെ തങ്ങളുടെ പ്രവർത്തന അടിത്തറയായി തിരഞ്ഞെടുത്ത ആഭ്യന്തര, അന്തർദ്ദേശീയ സ്റ്റാർട്ടപ്പുകളുമായി ശൈഖ് നഹ്യാൻ ചർച്ചയിൽ ഏർപ്പെട്ടു.
സ്ഥാപകർ അവരുടെ നൂതന ബിസിനസ്സ് മോഡലുകളും സമൂഹത്തെയും അബുദാബിയുടെ സമ്പദ്വ്യവസ്ഥയെയും ഗുണപരമായി സ്വാധീനിക്കുന്ന, തങ്ങളുടെ വ്യവസായങ്ങളുടെ ഭാവി പുനർനിർവചിക്കുന്നതിന് എഐയും മറ്റ് അത്യാധുനിക സാങ്കേതികവിദ്യകളും എങ്ങനെ വിന്യസിക്കാൻ ലക്ഷ്യമിടുന്നുവെന്നും അവതരിപ്പിച്ചു. ലോകമെമ്പാടുമുള്ള മികച്ച സ്റ്റാർട്ടപ്പുകളെ ആകർഷിക്കുന്നതിനായി സുസ്ഥിരവും ചലനാത്മകവുമായ ഒരു ഇക്കോസിസ്റ്റം സൃഷ്ടിക്കുന്നതിനുള്ള ഹബ്ബ്71ൻ്റെ സംരംഭങ്ങളെ ശൈഖ് നഹ്യാൻ പ്രശംസിച്ചു. യുഎഇ ദേശീയ ചാമ്പ്യന്മാരുമായി ഉറച്ച പങ്കാളിത്തം രൂപീകരിക്കേണ്ടതിൻ്റെയും സ്റ്റാർട്ടപ്പുകളെ പിന്തുണയ്ക്കുന്നതിൽ അബുദാബി സർക്കാർ സ്ഥാപനങ്ങളുമായി സഹകരിക്കുന്നതിൻ്റെയും പ്രാധാന്യം ഹബ്ബ്71-ൻ്റെ സിഇഒ അഹ്മദ് അലി അൽവാൻ എടുത്തുപറഞ്ഞു.
അബുദാബി ഗ്ലോബൽ മാർക്കറ്റിൻ്റെ പുരോഗമന നിയന്ത്രണ ചട്ടക്കൂട് അനുകൂലമായ നിയന്ത്രണ അന്തരീക്ഷം പ്രദാനം ചെയ്തുകൊണ്ട് സ്റ്റാർട്ടപ്പുകളെ കൂടുതൽ പിന്തുണയ്ക്കുന്നു. ഇത്തരത്തിൽ അബുദാബി ഇൻവെസ്റ്റ്മെൻ്റ് ഓഫീസ് (ADIO) ഹബ്ബ്71 സ്റ്റാർട്ടപ്പുകൾക്ക് ദീർഘകാല വിജയത്തിലേക്കുള്ള വ്യക്തമായ പാതയുണ്ടെന്ന് ഉറപ്പാക്കുന്നു. നിലവിൽ 22 മേഖലകളിലായി 315-ലധികം സ്റ്റാർട്ടപ്പുകളെ ഹബ്ബ്71 പിന്തുണയ്ക്കുന്നു, അത് 2019 മുതൽ 5.5 ബില്യൺ ദിർഹം മൂലധനം സമാഹരിക്കുകയും 3.7 ബില്യൺ ദിർഹം വരുമാനം നേടുകയും ചെയ്തതായാണ് കണക്കുകൾ.
WAM/അമൃത രാധാകൃഷ്ണൻ