മോസ്കോ, 23 ജൂൺ 2024 (WAM) --മോസ്കോയിൽ നടന്ന ബ്രിക്സ് ടൂറിസം മന്ത്രിമാരുടെ യോഗത്തിൽ യുഎഇ പ്രതിനിധി സംഘത്തെ സാമ്പത്തിക മന്ത്രിയും എമിറേറ്റ്സ് ടൂറിസം കൗൺസിൽ ചെയർമാനുമായ അബ്ദുല്ല ബിൻ തൂഖ് അൽ മർരി നയിച്ചു. സുസ്ഥിര ടൂറിസം വികസനത്തെ പിന്തുണയ്ക്കുന്നതിനും വിവിധ ടൂറിസം സാധ്യതകൾ പര്യവേക്ഷണം ചെയ്യുന്നതിനും ബ്രിക്സ് അംഗരാജ്യങ്ങൾക്കിടയിൽ സംയുക്ത സഹകരണം വളർത്തിയെടുക്കാൻ റഷ്യൻ ഫെഡറേഷൻ്റെ അധ്യക്ഷതയിൽ ചേർന്ന യോഗം ലക്ഷ്യമിടുന്നു.
ബ്രിക്സ് രാജ്യങ്ങളുമായുള്ള വിനോദസഞ്ചാര സഹകരണം വർധിപ്പിക്കുന്നതിനുള്ള യുഎഇ പ്രതിജ്ഞാബദ്ധമാണെന്ന് അബ്ദുല്ല ബിൻ തൂഖ് എടുത്തുപറഞ്ഞു.സാമ്പത്തിക വളർച്ചയും സാംസ്കാരിക വിനിമയവും പ്രോത്സാഹിപ്പിക്കുന്ന സുസ്ഥിര ടൂറിസം പങ്കാളിത്തത്തിന് പുതിയ വഴികൾ തുറക്കേണ്ടതിൻ്റെ പ്രാധാന്യം യോഗം ഊന്നിപ്പറഞ്ഞു.
എയർ കണക്റ്റിവിറ്റിയും ഇൻഫ്രാസ്ട്രക്ചറും മെച്ചപ്പെടുത്തുക, തന്ത്രപ്രധാനമായ സ്ഥലങ്ങൾ പ്രയോജനപ്പെടുത്തുക, ഡിജിറ്റൽ പരിവർത്തനം സ്വീകരിക്കുക, അംഗരാജ്യങ്ങൾക്കിടയിൽ യാത്ര സുഗമമാക്കുന്നതിനും വിനോദസഞ്ചാര പ്രവാഹം വർധിപ്പിക്കുന്നതിനുമുള്ള മികച്ച കീഴ്വഴക്കങ്ങൾ പങ്കുവയ്ക്കൽ എന്നിവയുൾപ്പെടെ പ്രതിരോധശേഷിയുള്ളതും സുസ്ഥിരവുമായ ഒരു ടൂറിസം മേഖല വികസിപ്പിക്കുന്നതിന് യുഎഇയുടെ പ്രതിബദ്ധത അദ്ദേഹം ആവർത്തിച്ചു. സുസ്ഥിര ടൂറിസം മെഷർമെൻ്റ് ചട്ടക്കൂട് നടപ്പിലാക്കുന്നതിനായി യുഎഇയും ഐക്യരാഷ്ട്രസഭയുടെ വേൾഡ് ടൂറിസം ഓർഗനൈസേഷനുമായി സജീവമായി സഹകരിക്കുന്നുണ്ടെന്നും, അദ്ദേഹം കൂട്ടിച്ചേർത്തു.
WAM/അമൃത രാധാകൃഷ്ണൻ