അബുദാബി, 5 ഫെബ്രുവരി 2024 (WAM) --ഇന്ത്യയിലെ ബാംഗ്ലൂർ ആസ്ഥാനമായുള്ള മണിപ്പാൽ ഹെൽത്ത് എൻ്റർപ്രൈസസിൽ (മണിപ്പാൽ) നിക്ഷേപം നടത്തുന്നതായി മുബദാല ഇൻവെസ്റ്റ്മെൻ്റ് കമ്പനി ഇന്ന് പ്രഖ്യാപിച്ചു. സിംഗപ്പൂർ ആസ്ഥാനമായുള്ള ആഗോള നിക്ഷേപക കമ്പനിയായ ടെമാസെക്ക് മണിപ്പാലിന്റെ ഭൂരിഭാഗ ഓഹരികൾ കൈവശം വയ്ക്കുന്നത് തുടരുമെന്നും അധികൃതർ അറിയിച്ചു.
മണിപ്പാൽ മൾട്ടിസ്പെഷ്യാലിറ്റി, ടെർഷ്യറി കെയർ നെറ്റ്വർക്കിലൂടെ താങ്ങാനാവുന്നതും ഉയർന്ന നിലവാരമുള്ളതുമായ ആരോഗ്യ സംരക്ഷണം വാഗ്ദാനം ചെയ്യുന്നു. നിലവിൽ രാജ്യവ്യാപകമായി 30-ലധികം ആശുപത്രികളിലൂടെ പ്രതിവർഷം 6 ദശലക്ഷം രോഗികൾക്കാണ് സേവനം നൽകുന്നത്. 5,000-ലധികം ഡോക്ടർമാർ ജോലി ചെയ്യുന്ന കമ്പനി, ഇന്ത്യയിലെ രണ്ടാമത്തെ വലിയ ആശുപത്രി ശൃംഖലയാണ്.
"മണിപ്പാൽ ഇന്ത്യയിലെ മുൻനിര ഹെൽത്ത് കെയർ നെറ്റ്വർക്കുകളിൽ ഒന്നാണ്. ക്ലിനിക്കൽ മികവിനോടുള്ള പ്രതിബദ്ധത, ശക്തമായ രോഗി കേന്ദ്രീകൃത സമീപനം, കോർപ്പറേറ്റ് ഭരണത്തിൻ്റെ കുറ്റമറ്റ മാനദണ്ഡങ്ങൾ എന്നിവയിലൂടെ ഇത് സ്വയം വേറിട്ടുനിൽക്കുന്നു," മുബദാലയിലെ ലൈഫ് സയൻസസ് മേധാവി കാമില മകാപ്പിലി ലാംഗില്ലെ പറഞ്ഞു. "ഇന്ത്യയിലുടനീളമുള്ള ഉയർന്ന നിലവാരമുള്ള ആശുപത്രി പരിചരണത്തിനുള്ള വർദ്ധിച്ചുവരുന്ന ആവശ്യം കണക്കിലെടുത്ത്, വരും വർഷങ്ങളിൽ മണിപ്പാലിൻ്റെ വളർച്ചാ യാത്രയെ പിന്തുണയ്ക്കാൻ ഞങ്ങൾ ആഗ്രഹിക്കുന്നു," അദ്ദേഹം കൂട്ടിച്ചേർത്തു.
“ബിസിനസിനെ വളർച്ചാ പാതയുടെ അടുത്ത ഘട്ടത്തിലേക്ക് നയിക്കാൻ ടെമാസെക്, ടിപിജി, ഡോ. രഞ്ജൻ പൈ, മണിപ്പാലിൻ്റെ മാനേജ്മെൻ്റ് ടീം തുടങ്ങിയ ഉയർന്ന നിലവാരമുള്ള പങ്കാളികളുമായി ചേർന്ന് പ്രവർത്തിക്കുന്നതിൽ ഞങ്ങൾക്ക് സന്തോഷമുണ്ട്,” ഡയറക്ട് ഏഷ്യാ മേധാവി ലൂക്കാ മൊളിനാരി പറഞ്ഞു. . "ഇന്ത്യയുടെ ദേശീയ ആരോഗ്യ സംരക്ഷണ ഇൻഫ്രാസ്ട്രക്ചർ വികസിപ്പിക്കുന്നതിൽ മണിപ്പാൽ ഒരു പ്രധാന പങ്ക് വഹിക്കുന്നു, അവരുമായി സഹകരിക്കുന്നതിൽ ഞങ്ങൾക്ക് അതിയായ സന്തോഷമുണ്ട്," അദ്ദേഹം കൂട്ടിച്ചേർത്തു.
1991-ൽ ഡോ. രഞ്ജൻ പൈ സ്ഥാപിച്ച മണിപ്പാൽ, ബാംഗ്ലൂരിലെ വേരുകളിൽ നിന്ന് അതിവേഗമാണ് വളർന്നത്.
WAM/ അമൃത രാധാകൃഷ്ണൻ