ദുബായ്, 12 ഫെബ്രുവരി 2024 (WAM) -- ഉപരാഷ്ട്രപതിയും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം അറബ് ധനകാര്യ മന്ത്രിമാരുമായി ലോക ഗവൺമെൻ്റ് ഉച്ചകോടി 2024 ഭാഗമായി ഇന്ന് നടന്ന അറബ് ഫിസ്ക്കൽ ഫോറത്തിൽ പങ്കെടുത്തു.
നിരവധി സാമ്പത്തിക, ധനകാര്യ നേതാക്കൾ പങ്കെടുത്ത ഫോറം ഡബ്ല്യൂജിഎസിൽ പങ്കെടുക്കുന്ന അറബ് പ്രതിനിധികളെ സ്വാഗതം ചെയ്തു. ലോക ഗവൺമെൻ്റുകളുടെ പൊതുവായ ലക്ഷ്യമായ സുസ്ഥിര വികസനം കൈവരിക്കുന്നതിന് മേഖലയിൽ, പ്രത്യേകിച്ച് അറബ് സർക്കാരുകൾക്കിടയിൽ, കാഴ്ചപ്പാടുകൾ സമന്വയിപ്പിക്കേണ്ടതിൻ്റെയും വൈദഗ്ധ്യം കൈമാറേണ്ടതിൻ്റെയും ആവശ്യകത ശൈഖ് മുഹമ്മദ് ബിൻ റാഷിദ് അൽ മക്തൂം ഊന്നിപ്പറഞ്ഞു.
ഫോറത്തിൽ, അറബ് ധനകാര്യ മന്ത്രിമാർ യുഎഇയുമായുള്ള തങ്ങളുടെ രാജ്യങ്ങളുടെ സഹകരണം വർദ്ധിപ്പിക്കാനും യുഎഇയുടെ പയനിയറിംഗ് അനുഭവത്തിൽ നിന്ന് പ്രയോജനം നേടാനുമുള്ള താൽപ്പര്യം പ്രകടിപ്പിച്ചു.
ഏറ്റവും പുതിയ ആഗോള ട്രെൻഡുകൾക്ക് അനുസൃതമായി പ്രവർത്തിക്കാനും സാമ്പത്തിക വെല്ലുവിളികളെ ഫലപ്രദമായി അഭിമുഖീകരിച്ച സമ്പദ്വ്യവസ്ഥകളുടെ വിജയഗാഥകളിൽ നിന്ന് ഉൾക്കാഴ്ചകൾ നേടാനുമാണ് ഡബ്ല്യൂജിഎസിലെ തങ്ങളുടെ പങ്കാളിത്തം ലക്ഷ്യമിടുന്നതെന്ന് അറബ് ധനകാര്യ മന്ത്രിമാർ പറഞ്ഞു.
ഫോറത്തിൽ ഇൻ്റർനാഷണൽ മോണിറ്ററി ഫണ്ട് (ഐഎംഎഫ്) മാനേജിംഗ് ഡയറക്ടർ ക്രിസ്റ്റലീന ജോർജീവ, ദുബായ് ഫസ്റ്റ് ഡെപ്യൂട്ടി ഭരണാധികാരിയും ഉപപ്രധാനമന്ത്രിയും ധനമന്ത്രിയുമായ ശൈഖ് മക്തൂം ബിൻ മുഹമ്മദ് ബിൻ റാഷിദ് അൽ മക്തൂം എന്നിവർ പങ്കെടുത്തു.
25-ലധികം രാഷ്ട്രത്തലവന്മാരും ലോകനേതാക്കളും, 85-ലധികം അന്തർദേശീയ, പ്രാദേശിക സംഘടനകളും, 140 ഗവൺമെൻ്റുകളും, ചിന്താ നേതാക്കളും അന്തർദേശീയ വിദഗ്ധരും ഒരുമിച്ച് കൊണ്ടുവരുന്നു, ഡബ്ല്യൂജിഎസ് 2024 ആഗോള തലത്തിലെ ഭാവി പ്രവണതകൾ പര്യവേക്ഷണം ചെയ്യാൻ ശ്രമിക്കുന്നു.
ഉച്ചകോടിയിൽ 110-ലധികം പ്ലീനറികൾ, പാനൽ ചർച്ചകൾ, സംവേദനാത്മക സെഷനുകൾ, 200 അന്താരാഷ്ട്ര സ്പീക്കറുകൾ, 23 മന്ത്രിതല യോഗങ്ങൾ, എക്സിക്യൂട്ടീവ് സെഷനുകൾ എന്നിവ ഉൾപ്പെടുന്നു, അതിൽ 300-ലധികം മന്ത്രിമാർ പങ്കെടുക്കുമെന്നാണ് പ്രതീക്ഷിക്കുന്നത്.
WAM/അമൃത രാധാകൃഷ്ണൻ