അബുദാബി, 26 ഫെബ്രുവരി 2024 (WAM) -- യുഎഇ വിദേശകാര്യ മന്ത്രി ശൈഖ് അബ്ദുല്ല ബിൻ സായിദ് അൽ നഹ്യാൻ, ഉപപ്രധാനമന്ത്രിയും വനുവാട്ടു വിദേശകാര്യ, അന്താരാഷ്ട്ര സഹകരണ വിദേശ വ്യാപാര മന്ത്രിയുമായ സെരേമയ്യ നവലുവിനെ സ്വീകരിച്ചു.
അബുദാബിയിൽ നടന്ന കൂടിക്കാഴ്ചയിൽ, യുഎഇയും വാനുവാട്ടുവും തമ്മിലുള്ള ഉഭയകക്ഷി ബന്ധങ്ങളും സഹകരണ മേഖലകളും വിവിധ സാമ്പത്തിക പദ്ധതികൾ, പുനരുപയോഗ ഊർജം, നിക്ഷേപം, വാണിജ്യം, വികസനം എന്നീ മേഖലകളിൽ അവ മുന്നോട്ടു കൊണ്ടുപോകാനുള്ള അവസരങ്ങളും ഇരു മന്ത്രിമാരും അവലോകനം ചെയ്തു.
മേഖലയിലെ സമീപകാല സംഭവവികാസങ്ങളെക്കുറിച്ചും അവർ ചർച്ച ചെയ്യുകയും പ്രാദേശികവും അന്തർദേശീയവുമായ നിരവധി വിഷയങ്ങളിൽ കാഴ്ചപ്പാടുകൾ കൈമാറുകയും ചെയ്തു.
ഉപപ്രധാനമന്ത്രിയുടെയും വനുവാട്ടു വിദേശകാര്യ, അന്താരാഷ്ട്ര സഹകരണ, വിദേശ വ്യാപാര മന്ത്രിയുടെയും സന്ദർശനത്തെ ശൈഖ് അബ്ദുല്ല ബിൻ സായിദ് സ്വാഗതം ചെയ്തു, ഇരു രാജ്യങ്ങളും തമ്മിലുള്ള സഹകരണം ശക്തിപ്പെടുത്തുന്നതിന് ഈ സന്ദർശനത്തിൻ്റെ പ്രാധാന്യം അദ്ദേഹം അടിവരയിട്ടു.
യുഎഇയുമായുള്ള വളർന്നുവരുന്ന ബന്ധം ഏകീകരിക്കാനുള്ള തൻ്റെ രാജ്യത്തിൻ്റെ അഭിലാഷം വാനുവാട്ടുവിൻ്റെ ഉപപ്രധാനമന്ത്രി പ്രകടിപ്പിച്ചു, പ്രാദേശിക, അന്തർദേശീയ തലങ്ങളിൽ രാജ്യത്തിൻ്റെ മുൻനിര സ്ഥാനത്തെ അദ്ദേഹം പ്രശംസിക്കുകയും ചെയ്തു.
യോഗത്തിൽ അന്താരാഷ്ട്ര സഹകരണ സഹമന്ത്രി റീം ബിൻത് ഇബ്രാഹിം അൽ ഹാഷിമി, സഹമന്ത്രി അഹമ്മദ് അലി അൽ സയേഗ്, സാമ്പത്തിക, വാണിജ്യകാര്യ അസിസ്റ്റൻ്റ് വിദേശകാര്യ മന്ത്രി സയീദ് മുബാറക് അൽ ഹജേരി എന്നിവർ പങ്കെടുത്തു.
WAM/അമൃത രാധാകൃഷ്ണൻ