അബുദാബി, 28 മാർച്ച് 2024 (WAM) --ഇന്ന് ലോകം അഭിമുഖീകരിക്കുന്ന ഏറ്റവും ഗുരുതരമായ പ്രശ്നങ്ങളിലൊന്ന് എന്ന നിലയിൽ, കാലാവസ്ഥ വ്യതിയാനത്തെ നേരിടാൻ, നിരവധി മതപരവും മാനുഷികവുമായ പ്രായോഗിക നടപടികളാണ് അൽ-അസ്ഹറിൻ്റെ ഗ്രാൻഡ് ഇമാം ഡോ. അഹമ്മദ് അൽ തയീബിൻ്റെ അധ്യക്ഷതയിലുള്ള മുസ്ലീം കൗൺസിൽ ഓഫ് എൽഡേഴ്സ് കൈക്കൊണ്ടത്.
പരിസ്ഥിതി സംരക്ഷിക്കുന്നതിനും ഹരിതഗൃഹ വാതക ഉദ്വമനം കുറയ്ക്കുന്നതിനും പ്രകൃതിവിഭവങ്ങളുടെ സുസ്ഥിരമായ ഉപയോഗം പ്രോത്സാഹിപ്പിക്കുന്നതിനും പരിസ്ഥിതി സൗഹൃദ സാങ്കേതിക വിദ്യകൾ നടപ്പിലാക്കുന്നതിനും രാജ്യങ്ങൾ ഒരുമിച്ച് പ്രവർത്തിക്കേണ്ടത് എത്ര പ്രധാനമാണെന്ന് ഈ പരിപാടികൾ തെളിയിക്കുന്നു.
കാലാവസ്ഥാ വ്യതിയാനവുമായി ബന്ധപ്പെട്ട അപകടസാധ്യതകൾ കുറയ്ക്കുന്നതിനും മനുഷ്യരാശിയുടെ ഭാവി സംരക്ഷിക്കുന്നതിനും ആത്മാർത്ഥവും പ്രതിബദ്ധതയുള്ളതുമായ ശ്രമങ്ങൾ ആവശ്യപ്പെടുന്ന ഒരു വേക്കപ്പ് കോൾ എന്ന് ഇതിനെ വിളിക്കാം. 2021-ൽ ഗ്ലാസ്ഗോയിൽ നടന്ന കോപ്26 യോഗത്തിന് വളരെ മുമ്പുതന്നെ കാലാവസ്ഥ വ്യതിയാനത്തിൻ്റെ വിനാശകരമായ പ്രത്യാഘാതങ്ങളെക്കുറിച്ച് മുന്നറിയിപ്പ് നൽകികൊണ്ട് ഗ്രാൻഡ് ഇമാം അഭിപ്രായപ്പെട്ടിരുന്നു.
ഈജിപ്തിൽ 2022-ൻ്റെ അവസാനത്തോടെ കോപ്27 കാലാവസ്ഥാ സമ്മേളനത്തിന് അനുസൃതമായി, അൽ-അസ്ഹറിലെ ഗ്രാൻഡ് ഇമാമും മുസ്ലീം കൗൺസിൽ ഓഫ് എൽഡേഴ്സിൻ്റെ ചെയർമാനും യുവാക്കളെ പാരിസ്ഥിതിക പ്രശ്നങ്ങളെക്കുറിച്ച് പഠിപ്പിക്കേണ്ടതിൻ്റെയും പാഠ്യപദ്ധതി വഴി കാലാവസ്ഥാ വ്യതിയാനം ലഘൂകരിക്കുന്നതിൻ്റെയും പ്രാധാന്യം ഊന്നിപ്പറഞ്ഞു. . നമ്മുടെ ഗ്രഹം അഭിമുഖീകരിക്കുന്ന ഗുരുതരമായ പ്രത്യാഘാതങ്ങളും ബുദ്ധിമുട്ടുകളും കാരണം, നിലവിലെ തലമുറകളുടെയും ഭാവി മനുഷ്യരുടെയും ഭാവി അപകടത്തിലാക്കുന്നു.
അതേ വർഷം തന്നെ, ബഹ്റൈനിലെ മനാമയിൽ നടന്ന മുസ്ലിം കൗൺസിൽ ഓഫ് എൽഡേഴ്സിൻ്റെ അസാധാരണമായ ഒരു യോഗത്തിൽ അധ്യക്ഷത വഹിച്ച ഗ്രാൻഡ് ഇമാം ഡോ. അഹമ്മദ് അൽ തയീബ്, പരിശുദ്ധ ഫ്രാൻസിസ് മാർപാപ്പയുടെ സാന്നിധ്യത്തിൽ, പരിസ്ഥിതി സംരക്ഷണത്തെക്കുറിച്ചുള്ള ഇസ്ലാമിൻ്റെ അധ്യാപനം ആവർത്തിച്ചു, നിക്ഷേപങ്ങൾക്ക് ആഹ്വാനം ചെയ്തു.
കഴിഞ്ഞ വർഷം യുഎഇ കോപ്28 ആതിഥേയത്വം വഹിച്ചതിന് ശേഷം, ഭൂമിയുടെ നിലനിൽപ്പിനെ അപകടപ്പെടുത്തുന്ന കാലാവസ്ഥാ ദുരന്തത്തിൻ്റെ പ്രതികൂല പ്രത്യാഘാതങ്ങളുമായി ലോകം പോരാടുമ്പോൾ, കാലാവസ്ഥാ വ്യതിയാനം ഉൾപ്പെടെയുള്ള ആഗോള വെല്ലുവിളികൾ പരിഹരിക്കുന്നതിൽ മതനേതാക്കളെ ഉൾപ്പെടുത്താനുള്ള ശ്രമങ്ങൾ മുസ്ലീം കൗൺസിൽ ഓഫ് എൽഡേഴ്സ് വർദ്ധിപ്പിച്ചു.
കാലാവസ്ഥ പ്രതിസന്ധിയിൽ മതനേതാക്കളെ ഒന്നിപ്പിക്കാൻ ആഗോളതലത്തിൽ ഏകോപിപ്പിച്ച സംരംഭങ്ങൾ 2023-ൽ ആരംഭിച്ചു. മുസ്ലീം കൗൺസിൽ ഓഫ് എൽഡേഴ്സ് സെക്രട്ടറി ജനറൽ, ജഡ്ജി മുഹമ്മദ് അബ്ദുൽസലാം, കാലാവസ്ഥാ വ്യതിയാനത്തെ അഭിസംബോധന ചെയ്യാൻ മതനേതാക്കളെ പ്രചോദിപ്പിക്കുന്നതിനുള്ള ഒരു കാമ്പെയ്ൻ ആരംഭിക്കുന്നതിനെക്കുറിച്ച് ചർച്ച ചെയ്യുന്നതിനായി, ഇറ്റലിയിലെ റോമിൽ, പരിശുദ്ധ ഫ്രാൻസിസ് മാർപാപ്പയുമായി പല അവസരങ്ങളിലും കൂടിക്കാഴ്ച നടത്തി.
ഇന്തോനേഷ്യയിലെ ജക്കാർത്തയിൽ നടന്ന കൗൺസിലിന്റെ മത കാലാവസ്ഥ വ്യതിയാന സമ്മേളനത്തിൽ പ്രദേശത്തെ കാലാവസ്ഥ സംഭാഷണങ്ങൾ നടത്തുന്ന ഗവേഷകരും, യുവാക്കളും, 150 ഓളം വരുന്ന മതപ്രവർത്തകരും പങ്കെടുത്തു.
ആ വർഷം, കോപ്28 പ്രസിഡൻസി, യുഎഇയുടെ സഹിഷ്ണുത, സഹവർത്തിത്വം മന്ത്രാലയം, യുഎൻ പരിസ്ഥിതി പരിപാടി എന്നിവയുടെ സഹകരണത്തോടെ കൗൺസിൽ അബുദാബിയിൽ ഗ്ലോബൽ ഫെയ്ത്ത് ലീഡേഴ്സ് ഉച്ചകോടി സംഘടിപ്പിച്ചു. പണ്ഡിതർ, പരിസ്ഥിതി വിദഗ്ധർ, സ്ത്രീകൾ, യുവജനങ്ങൾ, തദ്ദേശവാസികൾ എന്നിവരുൾപ്പെടെയുള്ള പൗരസമൂഹത്തിലെ അംഗങ്ങൾക്കൊപ്പം മുപ്പത് മതവിഭാഗങ്ങളിൽ നിന്നും മറ്റ് പതിനെട്ട് മതങ്ങളിൽ നിന്നുമുള്ള പ്രതിനിധികൾ ഉച്ചകോടിയിൽ ഒത്തുചേർന്നു.
കാലാവസ്ഥ വ്യതിയാനത്തെ ചെറുക്കുന്നതിനും പരിസ്ഥിതിയെ സംരക്ഷിക്കുന്നതിനും ശക്തമായ നടപടികൾ സ്വീകരിക്കണമെന്ന് ആഹ്വാനം ചെയ്യുന്ന 'മനഃസാക്ഷിയുടെ കോൾ: കാലാവസ്ഥയ്ക്കുള്ള അബുദാബി ഇൻ്റർഫെയ്ത്ത് സ്റ്റേറ്റ്മെൻ്റ്' ഒപ്പിട്ടതോടെയാണ് ഉച്ചകോടി അവസാനിച്ചത്. വിശുദ്ധ ഫ്രാൻസിസ് മാർപാപ്പയും കത്തോലിക്കാ സഭയുടെ പോണ്ടിഫും മറ്റ് 28 മതനേതാക്കളും ഒപ്പിട്ടവരിൽ ഉൾപ്പെടുന്നു.
കാലാവസ്ഥ ഉച്ചകോടിയുടെ ആദ്യമായി, ഈ സംരംഭങ്ങൾ കോപ്28 ഫെയ്ത്ത് പവലിയനിൽ പ്രദർശിപ്പിച്ചു. 65-ലധികം സംഭാഷണ സെഷനുകളും ലോകമെമ്പാടുമുള്ള 325 സ്പീക്കറുകളും ഉള്ളതിനാൽ, പരിസ്ഥിതി നീതിയെ പ്രോത്സാഹിപ്പിക്കുന്നതിനും ഭാവിക്കു വേണ്ടി പരിസ്ഥിതിയെ സംരക്ഷിക്കുന്നതിനുമായി മതാന്തര ചർച്ചകൾക്കായി ഒരു ആഗോള ഫോറം സ്ഥാപിച്ചു.
മുന്നോട്ട് പോകുമ്പോൾ, ഈ സംരംഭങ്ങൾ വിപുലീകരിക്കാനും കാലാവസ്ഥ വ്യതിയാനം ലഘൂകരിക്കുന്നതിൽ, പ്രത്യേകിച്ച് ലോകത്തിലെ ഏറ്റവും ദുർബലരായ രാജ്യങ്ങളിലെ കാലാവസ്ഥ പ്രവർത്തനങ്ങളിൽ, മതപരമായ വ്യക്തികളുടെയും നേതാക്കന്മാരുടെയും പങ്ക് കൂടുതൽ വിപുലീകരിക്കാനും കൗൺസിൽ ഉദ്ദേശിക്കുന്നു.
WAM/അമൃത രാധാകൃഷ്ണൻ