അബുദാബി, 30 ഏപ്രിൽ 2024 (WAM) --ഉപരാഷ്ട്രപതിയും ഉപപ്രധാനമന്ത്രിയും പ്രസിഡൻഷ്യൽ കോടതി പ്രസിഡൻ്റുമായ ശൈഖ് മൻസൂർ ബിൻ സായിദ് അൽ നഹ്യാൻ്റെ സാന്നിധ്യത്തിൽ യുഎഇ രാഷ്ട്രപതി ശൈഖ് മുഹമ്മദ് ബിൻ സായിദ് അൽ നഹ്യാൻ ചൊവ്വാഴ്ച പ്രസിഡൻഷ്യൽ ഒട്ടക റേസിംഗ് ടീമിനെ സ്വീകരിച്ചു.
അബുദാബിയിലെ സ്വീകരണ വേളയിൽ, യുഎഇ രാഷ്ട്രപതിയുടെ ഉപദേഷ്ടാവും യുഎഇ ഒട്ടക റേസിംഗ് ഫെഡറേഷൻ ചെയർമാനുമായ ശൈഖ് സുൽത്താൻ ബിൻ ഹംദാൻ അൽ നഹ്യാൻ, ഉത്സവങ്ങളിലും മത്സരങ്ങളിലും പങ്കെടുത്തതിലെ ടീമിൻ്റെ നേട്ടങ്ങളെക്കുറിച്ച് രാഷ്ട്രപതിക്ക് വിശദീകരിച്ചു.
ഗ്രൂപ്പിൻ്റെ നേട്ടങ്ങളെ ശൈഖ് മുഹമ്മദ് അഭിനന്ദിക്കുകയും സമീപകാല ടൂർണമെൻ്റുകളിൽ അവരുടെ ശ്രമങ്ങളെ പ്രശംസിക്കുകയും ചെയ്തു. രാജ്യത്തിൻ്റെ സമ്പന്നമായ പൈതൃകത്തെയും സംസ്കാരത്തെയും പ്രതിനിധീകരിക്കുന്ന ഒട്ടക ഓട്ടമത്സരം ഉൾപ്പെടെയുള്ള പരമ്പരാഗത കായിക വിനോദങ്ങൾക്ക് എമിറേറ്റ്സിലെ ജനങ്ങൾക്ക് ചരിത്രപരവും സാമൂഹികവുമായ പ്രാധാന്യമുണ്ടെന്ന് അദ്ദേഹം ഊന്നിപ്പറഞ്ഞു. പരമ്പരാഗത കായിക വിനോദങ്ങളും പ്രവർത്തനങ്ങളും സംരക്ഷിക്കുന്നതിനും പ്രോത്സാഹിപ്പിക്കുന്നതിനും അടുത്ത തലമുറയെ അവരുടെ പരിശീലനം തുടരാൻ പ്രോത്സാഹിപ്പിക്കുന്നതിനും യുഎഇ പ്രതിജ്ഞാബദ്ധമാണെന്ന് യുഎഇ രാഷ്ട്രപതി അടിവരയിട്ടു.
രാജ്യത്തിൻ്റെ പൈതൃകത്തിന് സംഭാവന നൽകുന്ന ഒട്ടക ഓട്ടത്തിനും പരമ്പരാഗത കായിക ഇനങ്ങൾക്കും ലഭിച്ച തുടർച്ചയായ പിന്തുണയ്ക്ക് പ്രതിനിധി സംഘാംഗങ്ങൾ രാഷ്ട്രപതിയോട് നന്ദി പറഞ്ഞു.
2024 അൽ ദഫ്ര ഒട്ടക റേസിംഗ് ഫെസ്റ്റിവലിൽ അടുത്തിടെ നടന്ന പ്യുവർ അറേബ്യൻ ഒട്ടക റേസിംഗ് വിഭാഗത്തിൽ പങ്കെടുത്തപ്പോൾ, ഈ സീസണിലെ അവരുടെ അഞ്ചാമത്തെ കിരീടം (യുഎഇ പ്രസിഡൻ്റിൻ്റെ വാൾ) ടീം സ്വന്തമാക്കിയിരുന്നു.
WAM/അമൃത രാധാകൃഷ്ണൻ