അബുദാബി, 30 ഏപ്രിൽ 2024 (WAM) - യുഎഇ രാഷ്ട്രപതി ശൈഖ് മുഹമ്മദ് ബിൻ സായിദ് അൽ നഹ്യാൻ ഇന്ന് കാനഡയിലെ എംസി ഗിൽ സർവകലാശാലയിൽ നിന്നുള്ള ഒരു പ്രതിനിധി സംഘത്തെ സ്വീകരിച്ചു.
അബുദാബിയിലെ ഖസർ അൽ ബഹറിൽ നടന്ന കൂടിക്കാഴ്ചയിൽ, നിരവധി സർവകലാശാലാ ഉദ്യോഗസ്ഥർ ഉൾപ്പെട്ട പ്രതിനിധി സംഘത്തെ ശൈഖ് മുഹമ്മദ് സ്വാഗതം ചെയ്തു. ശാസ്ത്ര സാങ്കേതിക മേഖലകളിൽ ഉയർന്ന നിലവാരമുള്ള ദേശീയ പ്രതിഭകളെ വാർത്തെടുക്കാൻ ലോകമെമ്പാടുമുള്ള പ്രീമിയർ വിദ്യാഭ്യാസ സ്ഥാപനങ്ങളുമായും സർവ്വകലാശാലകളുമായും പങ്കാളിത്തം കെട്ടിപ്പടുക്കാനുള്ള യുഎഇയുടെ താൽപര്യം യുഎഇ രാഷ്ട്രപതി ഊന്നിപ്പറഞ്ഞു. യുവാക്കൾ രാജ്യത്തിൻ്റെ ഏറ്റവും വലിയ വിഭവമാണെന്നും അതിനനുസരിച്ച് പരിപോഷിപ്പിക്കപ്പെടേണ്ടതുമാണെന്ന വിശ്വാസത്തെ അടിസ്ഥാനമാക്കി, യുഎഇയുടെ വികസന കാഴ്ചപ്പാടിൽ സർഗ്ഗാത്മകതയും പുതുമയും ഉൾക്കൊള്ളുന്ന യോഗ്യരായ യുവാക്കളിൽ നിക്ഷേപം നടത്തുക എന്നത് ഒരു പ്രധാന മുൻഗണനയാണെന്ന് ശൈഖ് മുഹമ്മദ് വിശദീകരിച്ചു.
സുസ്ഥിര വികസനം കൈവരിക്കുന്നതിനുള്ള ഭാവി കേന്ദ്രീകൃത കാഴ്ചപ്പാടിൻ്റെ ഭാഗമായി ശാസ്ത്ര സാങ്കേതിക മേഖലകൾക്ക് യുഎഇ നൽകുന്ന പ്രാധാന്യത്തെ അഭിനന്ദിച്ചുകൊണ്ട് പ്രതിനിധി സംഘം രാഷ്ട്രപതിയെ കാണുന്നതിൽ സന്തോഷം പ്രകടിപ്പിച്ചു.
2015-ൽ, അബുദാബിയിലെ ക്രൗൺ പ്രിൻസ് കോടതി, എംസി ഗിൽ സർവകലാശാലയുമായി സഹകരിച്ച്, ശാസ്ത്രത്തിലും എഞ്ചിനീയറിംഗിലും എംസി ഗിൽ-യുഎഇ ഫെലോഷിപ്പുകൾ ആരംഭിച്ചു. സയൻസ്, ടെക്നോളജി, എഞ്ചിനീയറിംഗ്, മാത്തമാറ്റിക്സ് എന്നീ മേഖലകളിലെ എംസി ഗിൽ യൂണിവേഴ്സിറ്റിയിലെ സയൻസ്, എഞ്ചിനീയറിംഗ് ഫാക്കൽറ്റികളിൽ വിദ്യാഭ്യാസം പൂർത്തിയാക്കുന്നതിന് എമിറാത്തി പൗരന്മാരെ സഹായിക്കാൻ ലക്ഷ്യമിടുന്നതാണ് പ്രോഗ്രാം. മികച്ച മാസ്റ്റേഴ്സ്, പിഎച്ച്ഡി വിദ്യാർത്ഥികൾക്ക് ഫെലോഷിപ്പ് അനുവദിക്കുകയും യൂണിവേഴ്സിറ്റി മേൽനോട്ടത്തിൽ കാനഡയ്ക്കകത്തും പുറത്തുമുള്ള ഫീൽഡ് സന്ദർശനങ്ങൾക്ക് പുറമേ, മികച്ച ശാസ്ത്ര, എഞ്ചിനീയറിംഗ് കമ്പനികളിലെ പരിശീലന അവസരങ്ങളിൽ നിന്ന് പ്രയോജനം നേടാനും ഫെലോഷിപ്പ് അവരെ പ്രാപ്തരാക്കുന്നു.
WAM/അമൃത രാധാകൃഷ്ണൻ