അബുദാബി, 1 മെയ്, 2024 (WAM) -- എണ്ണയിൽ നിന്ന് മാറി വിജ്ഞാനാധിഷ്ഠിതവും നൂതനവുമായ ഒരു മാതൃകയിലേക്ക് സമ്പദ്വ്യവസ്ഥയെ വിജയകരമായി വൈവിധ്യവത്കരിക്കുന്നതിനുള്ള യുഎഇയുടെ ശ്രമങ്ങളെ യുഎൻ പ്രത്യേക ദൂതനായ ഇൻ്റർനാഷണൽ മോണിറ്ററി ഫണ്ടിലെ (IMF) എക്സിക്യൂട്ടീവ് ഡയറക്ടർ ഡോ. മഹമൂദ് മൊഹിദ്ദീൻ, അഭിനന്ദിച്ചു.
"യുഎഇ തങ്ങളുടെ നിലവിലെ ലക്ഷ്യം മറികടന്ന് ഉയർന്ന തലത്തിലുള്ള സാമ്പത്തിക വൈവിധ്യവൽക്കരണം കൈവരിച്ചു. രാജ്യത്തിൻ്റെ മൊത്തം ജിഡിപിയുടെ 74 ശതമാനവും എണ്ണ മേഖലയാണ്," ഇന്ന് അബുദാബി ഗ്ലോബൽ മാർക്കറ്റിൽ നടന്ന ഇക്കണോമി മിഡിൽ ഈസ്റ്റ് ഉച്ചകോടി 2024 ൻ്റെ ഭാഗമായി എമിറേറ്റ്സ് ന്യൂസ് ഏജൻസിക്ക് നൽകിയ പ്രസ്താവനയിൽ മൊഹിദ്ദീൻ പറഞ്ഞു.
ആഗോള, പ്രാദേശിക സമ്പദ്വ്യവസ്ഥയിലെ ഏറ്റവും പുതിയ സംഭവവികാസങ്ങൾ ചർച്ച ചെയ്യുന്നതിനും യുഎഇയിലെയും മേഖലയിലെയും നിക്ഷേപ അവസരങ്ങൾ ഉയർത്തിക്കാട്ടുന്നതിനും പര്യവേക്ഷണം ചെയ്യുന്നതിനുമായി യുഎഇ തലസ്ഥാനമായ അബുദാബിയിൽ ആദ്യമായി നടക്കുന്ന ഇക്കണോമി മിഡിൽ ഈസ്റ്റ് ഉച്ചകോടിയുടെ പ്രാധാന്യം മൊഹിദ്ദീൻ ഊന്നിപ്പറഞ്ഞു.
“യുഎഇയിലെ വളർച്ചാ നിരക്കുകളിലും സാമ്പത്തിക സൂചകങ്ങളിലും ശ്രദ്ധേയമായ പുരോഗതി ഉണ്ടായിട്ടുണ്ട്. ഹരിത സമ്പദ്വ്യവസ്ഥ, ഡിജിറ്റൽ സമ്പദ്വ്യവസ്ഥ, ഡിജിറ്റൽ പരിവർത്തനത്തിൻ്റെ പ്രയോജനം ലഭിക്കുന്ന സ്മാർട്ട് നിക്ഷേപങ്ങൾ തുടങ്ങിയ പുതിയ സാമ്പത്തിക മേഖലകളിലെ വർധിച്ച നിക്ഷേപത്തോടൊപ്പം രാജ്യത്തിൻ്റെ സാമ്പത്തിക വൈവിധ്യവൽക്കരണ നയത്തെ ഇത് ശക്തിപ്പെടുത്തുന്നു," അദ്ദേഹം പറഞ്ഞു.
ഏകദേശം 25 വർഷമായി സ്ഥിരമായ വളർച്ച കൈവരിച്ച ജപ്പാൻ, സിംഗപ്പൂർ, മലേഷ്യ തുടങ്ങിയ രാജ്യങ്ങളുടെ സുസ്ഥിരമായ അനുഭവങ്ങളുമായി യുഎഇയുടെ വളർച്ച ലക്ഷ്യങ്ങൾ യോജിക്കുന്നുവെന്ന് മൊഹിദ്ദീൻ വിശദീകരിച്ചു.
വമ്പിച്ച നിക്ഷേപങ്ങളുടെയും മനുഷ്യ മൂലധനത്തിൻ്റെയും സാന്നിധ്യം കൊണ്ട് ഉയർന്ന വളർച്ചാ നിരക്ക് കൈവരിക്കാൻ യുഎഇ സമ്പദ് വ്യവസ്ഥയ്ക്ക് ശേഷിയുണ്ടെന്ന് അദ്ദേഹം ചൂണ്ടിക്കാട്ടി.
WAM/അമൃത രാധാകൃഷ്ണൻ