അബുദാബി, 21 മെയ്, 2024 (WAM) --യുഎഇ രാഷ്ട്രപതി ശൈഖ് മുഹമ്മദ് ബിൻ സായിദ് അൽ നഹ്യാൻ ഫ്രഞ്ച് മന്ത്രി ബ്രൂണോ ലെ മെയ്റുമായി അബുദാബിയിലെ കസർ അൽ ബഹറിൽ കൂടിക്കാഴ്ച നടത്തി. സുസ്ഥിര വികസനത്തെ പിന്തുണയ്ക്കുന്ന പ്രധാന മേഖലകളിൽ ശ്രദ്ധ കേന്ദ്രീകരിച്ച് യുഎഇയും ഫ്രാൻസും തമ്മിലുള്ള തന്ത്രപരമായ ബന്ധത്തെക്കുറിച്ച് ഇരു നേതാക്കളും ചർച്ച ചെയ്തു.
ഫ്രഞ്ച് രാഷ്ട്രപതി ഇമ്മാനുവൽ മാക്രോണിൻ്റെ അഭിവാദ്യങ്ങൾ മന്ത്രി ശൈഖ് മുഹമ്മദിനെ അറിയിക്കുകയും യുഎഇയുടെയും അവിടത്തെ ജനങ്ങളുടെയും നിലവിലുള്ള വികസനത്തിൽ തൻ്റെ പ്രതീക്ഷകൾ പ്രകടിപ്പിക്കുകയും ചെയ്തു. ഫ്രാൻസിനും അവിടത്തെ ജനങ്ങളുടെയും തുടർച്ചയായ പുരോഗതിക്കും വളർച്ചയ്ക്കും വേണ്ടിയുള്ള ആഗ്രഹം പ്രകടിപ്പിച്ചുകൊണ്ട് യുഎഇ രാഷ്ട്രപതി മാക്രോണിന് തൻ്റെ അഭിവാദനങ്ങൾ അറിയിച്ചു.
ഇരു രാജ്യങ്ങളും തമ്മിലുള്ള ഫലപ്രദമായ പങ്കാളിത്തം വിപുലീകരിക്കാൻ ലക്ഷ്യമിട്ട് അബുദാബിയിൽ അടുത്തിടെ നടന്ന 16-ാമത് യുഎഇ-ഫ്രാൻസ് സ്ട്രാറ്റജിക് ഡയലോഗിൻ്റെ ഫലങ്ങളും യോഗം ചർച്ച ചെയ്തു. സുസ്ഥിര വികസനം പ്രോത്സാഹിപ്പിക്കുന്നതിൽ ഈ ചർച്ചകളുടെ പ്രാധാന്യവും യോഗം എടുത്തുപറഞ്ഞു.
WAM/അമൃത രാധാകൃഷ്ണൻ