ویانا، 2 جون 2024 (وام) - اوپیک اور غیر اوپیک ممالک کے وزراء کی 37 ویں میٹنگ میں فیصلہ کیا گیا ہے کہ یکم جنوری 2025 سے 31 دسمبر 2025 تک اوپیک اور غیر اوپیک ممالک کی مجموعی خام تیل کی پیداوار کی سطح کو برقرار رکھا جائے گا۔
شرکت کرنے والے ممالک نے متحدہ عرب امارات کی 2025 میں تیل کی پیداوار کی نئی حد 35 لاکھ 19 ہزار بیرل یومیہ مقرر کرنے پر بھی اتفاق کیا ہے، جو کہ موجودہ پیداوار سے 3 لاکھ بیرل یومیہ زیادہ ہے اور اسے جنوری 2025 سے ستمبر 2025 تک مرحلہ وار نافذ کیا جائے گا۔
کچھ رکن ممالک کی طرف سے اپنائی گئی رضاکارانہ کٹوتیوں کی مجموعی مقدار 22 لاکھ بیرل یومیہ تک پہنچ گئی ہے، جبکہ اوپیک پلس ممالک کی مجموعی کٹوتی 58 لاکھ 60 ہزار بیرل یومیہ ہے، جسے اگلے سال کے آخر تک بڑھا دیا گیا ہے۔
اوپیک کے ایک بیان میں کہا گیا ہے کہ آج کے فیصلے اوپیک اور غیر اوپیک ممالک کے درمیان تعاون کے اعلامیہ کے تحت ایک مستحکم تیل کی منڈی کو حاصل کرنے اور برقرار رکھنے، اور منڈی کے لیے طویل مدتی رہنمائی اور شفافیت فراہم کرنے کے لیے جاری عزم کی روشنی میں کیے گئے ہیں۔
شرکت کرنے والے ممالک نے یہ بھی فیصلہ کیا کہ 10 دسمبر 2016 کو دستخط شدہ تعاون کے اعلامیہ کے فریم ورک کی توثیق کی جائے، جس کی بعد میں ہونے والی میٹنگز میں توثیق کی گئی تھی۔ تین آزاد ذرائع کی طرف سے تشخیص کی مدت کو نومبر 2025 کے آخر تک بڑھایا جائے، جسے 2026 میں پیداوار کی سطح کے حوالے کے طور پر استعمال کیا جائے گا۔ مشترکہ وزارتی نگرانی کمیٹی کے مینڈیٹ کی توثیق کی جائے تاکہ وہ عالمی تیل کی منڈی کے حالات، تیل کی پیداوار کی سطح اور تعاون کے اعلامیہ کے ساتھ مطابقت کی سطح کا جائزہ لے۔اوپیک اور غیر اوپیک وزارتی میٹنگ ہر چھ ماہ بعد منعقد کی جائے۔مشترکہ وزارتی نگرانی کمیٹی کو اختیار دیا جائے کہ وہ مارکیٹ کی صورتحال سے نمٹنے کے لیے کسی بھی وقت اضافی اجلاس منعقد کر سکتی ہے یا اوپیک اور غیر اوپیک وزارتی میٹنگ کی درخواست کر سکتی ہے۔
38 ویں اوپیک اور غیر اوپیک وزارتی میٹنگ یکم دسمبر 2024 کو منعقد ہوگی۔