نیویارک، 11 جولائی، 2024 (وام) – اقوام متحدہ کے ہائی لیول پولیٹیکل فورم میں متحدہ عرب امارات کے وفد نے اقوام متحدہ کی ڈپٹی سیکریٹری جنرل امینہ محمد سے نیویارک میں یو این کے ہیڈکوارٹر میں ملاقات کی۔ اس ملاقات میں آئندہ چھ سالوں میں پائیدار ترقی کے اہداف (SDGs) پر پیش رفت کو تیز کرنے پر تبادلہ خیال کیا گیا۔
اقوام متحدہ کی ڈپٹی سیکریٹری جنرل کے ساتھ متحدہ عرب امارات کے وفد کی ملاقات میں پائیدار ترقی کے اہداف (SDGs) کے حصول کے لیے علم کے تبادلے، بین الاقوامی تعاون اور شراکت داری پر توجہ مرکوز کی گئی۔ متحدہ عرب امارات نے ایسے اقدامات پیش کیے جو آئندہ نسلوں کے لیے وسائل کو محفوظ رکھتے ہوئے جامع ترقی کو فروغ دیتے ہیں۔ وفد میں مختلف تنظیموں کے نمائندے شامل تھے، جن میں امارات ہلال احمر، ابوظہبی فنڈ فار ڈیولپمنٹ، وزارت داخلہ اور مصدر شامل ہیں۔
اقوام متحدہ کی ڈپٹی سیکریٹری جنرل امینہ محمد اور متحدہ عرب امارات کے وفد کے سربراہ عبداللہ ناصر لوتاہ نے پائیدار ترقی کو تیز کرنے میں تعاون کے عزم کا اظہار کیا۔
امینہ محمد نے 2030 کے ایجنڈے اور اس سے آگے کے لیے متحدہ عرب امارات کے ساتھ مزید تعاون کی توقع کی، جبکہ عبداللہ ناصر لوتاہ نے غربت، بھوک، موسمیاتی تبدیلی اور ادارہ جاتی ترقی کے مسائل سے نمٹنے کے لیے اقوام متحدہ کے ساتھ شراکت داری کے لیے متحدہ عرب امارات کے عزم پر زور دیاہے۔
انہوں نے پائیدار ترقی کے لیے جدید حل کو آگے بڑھانے کے لیے اسٹریٹجک عالمی شراکت داری اور علم کے تبادلے کے متحدہ عرب امارات کے وژن کو اجاگر کیا، جس سے متحدہ عرب امارات ترقی کے اہداف کے حصول اور امن، انصاف اور بین الاقوامی اداروں کی حمایت میں ایک قابل اعتماد عالمی شراکت دار کے طور پر سامنے آیاہے۔