اسلام آباد، یکم اگست، 2024 (وام) – وزیراعظم پاکستان شہباز شریف نے ایشیا انٹرنیٹ کولیشن (اے آئی سی) کے وفد سے ملاقات کے دوران ملک میں انٹرنیٹ کنیکٹیویٹی کو بہتر بنانے اور مصنوعی ذہانت کے بنیادی ڈھانچے کو فروغ دینے کے عزم کا اعلان کیاہے۔ ایشیا انٹرنیٹ کولیشن کے وفد کی قیادت منیجنگ ڈائریکٹر جیف پین کر رہے تھے۔
ایسوسی ایٹڈ پریس آف پاکستان کے مطابق، ملاقات میں ڈیٹا سیکیورٹی، اخلاقی انٹرنیٹ مواد اور سائبر سیکیورٹی کے اقدامات پر بات چیت کی گئی ہے۔
وزیراعظم نے ایک مضبوط اے آئی انفراسٹرکچر کی تعمیر اور پاکستان کو مصنوعی ذہانت کی ترقی میں ایک علاقائی رہنما کے طور پر پیش کرنے کے لیے حکومت کے عزم پر زور دیاہے۔
انہوں نے مزید کہا کہ ڈیجیٹل پاکستان کے اقدام کے تحت پورے نظام کو ڈیجیٹل کیا جا رہا ہے اور امید ظاہر کی کہ فیڈرل بورڈ آف ریونیو کی ڈیجیٹلائزیشن معاشی خودکار کاری کی جانب یہ ایک سنگ میل ثابت ہوگی۔
اس ملاقات میں مسودہ پرسنل ڈیٹا پروٹیکشن بل کے حوالے سے اسٹیک ہولڈرز کے ساتھ جاری مشاورت پر بھی بات چیت کی گئی جو ڈیٹا کی رازداری اور سیکیورٹی کو یقینی بنانے کے لیے ایک اہم قدم ہے۔