عجمان، 19 ستمبر، 2024 (وام) -- عجمان چیمبر آف کامرس اینڈ انڈسٹری کے ڈائریکٹر جنرل، سالم السویدی نے پاکستان کے قونصل جنرل، حسین محمد کے ساتھ ملاقات میں دونوں ممالک کے درمیان تجارت کو فروغ دینے اور مینوفیکچرنگ انڈسٹری، زرعی مصنوعات اور قابل تجدید توانائی کے شعبوں میں باہمی سرمایہ کاری کے مواقع بڑھانے کے طریقوں پر تبادلہ خیال کیا ہے۔
اس ملاقات میں عجمان چیمبر میں سٹڈیز اینڈ انویسٹمنٹ ڈویلپمنٹ سیکٹر کے ایگزیکٹو ڈائریکٹر علی راشد الکتوب، اور پاکستان کے قونصل خانے میں تجارتی اور سرمایہ کاری کے مشیرعلی زیب خان نے بھی شرکت کی۔
سالم السویدی نے اس ملاقات کی اہمیت پر زور دیتے ہوئے کہا کہ یہ عجمان اور پاکستان کے درمیان باہمی تعاون کے امکانات پر تبادلہ خیال کے لیے ایک بامعنی اور براہ راست رابطے کا چینل کھولنے میں کلیدی کردار ادا کرے گی۔
انہوں نے بتایا کہ 2023 میں 4,194 پاکستانی تاجر عجمان چیمبر کے رکن بنے، جو بنیادی طور پر خوردہ، تعمیرات، مینوفیکچرنگ، اور مہمان نوازی کے شعبوں میں اپنا کردار ادا کر رہے ہیں۔
حسین محمد نے پاکستان کے کلیدی شعبوں، جن میں ٹیکسٹائل، لباس، اور زراعت شامل ہیں، کو نمایاں کیا اور تجارت کو فروغ دینے میں نمائشوں کی اہمیت پر زور دیا۔ انہوں نے عجمان چیمبر کو اس سال اکتوبر میں کراچی میں ہونے والی ٹیکسٹائل اور لباس کی نمائش میں شرکت کی دعوت دی، جو دونوں ممالک کی کمپنیوں کے درمیان جدتوں کی نمائش اور تعاون کو فروغ دینے کا ایک عالمی پلیٹ فارم ہے۔