ابوظبی، 4 فروری 2025 (وام) – ابوظبی پورٹس گروپ نے العین ملز، جو الحزا انویسٹمنٹ گروپ کا حصہ ہے، کے ساتھ 50 سالہ زمین لیز معاہدے پر دستخط کیے ہیں۔ اس اسٹریٹجک شراکت داری کے تحت خلیفہ پورٹ کے ساؤتھ کوے پر جدید اناج ذخیرہ کرنے اور پروسیسنگ کی سہولت قائم کی جائے گی، جس سے پورٹ کی استعداد کار میں مزید اضافہ ہوگا اور اسے خطے میں ایک اہم تجارتی مرکز کے طور پر مزید مستحکم کیا جائے گا۔
یہ 50,000 مربع میٹر پر محیط سہولت تقریباً 300,000 میٹرک ٹن اناج ذخیرہ کرنے کی گنجائش رکھے گی اور تعمیراتی کام کے آغاز کے دو سال چھ ماہ کے اندر فعال ہو جائے گی۔
یہ منصوبہ خلیفہ پورٹ کے ایک اسٹریٹجک مقام پر تعمیر کیا جائے گا، جو العین ملز کو گہرے پانی کے برتھز اور عالمی معیار کی بندرگاہی سہولیات تک براہ راست رسائی فراہم کرے گا۔ اس سے عالمی معیار کے اناج ذخیرہ کرنے اور سنبھالنے کی صلاحیت میں نمایاں بہتری آئے گی، جس سے نہ صرف متحدہ عرب امارات بلکہ پورے خلیجی خطے میں اعلیٰ معیار کی غذائی مصنوعات کی بڑھتی ہوئی مانگ پوری کرنے میں مدد ملے گی۔
ابوظبی پورٹس گروپ کے پورٹس کلسٹر کے چیف ایگزیکٹو آفیسر، سیف المزروعی، نے معاہدے پر تبصرہ کرتے ہوئے کہاکہ، "ہم العین ملز کو خلیفہ پورٹ میں خوش آمدید کہتے ہیں۔ یہ معاہدہ خلیفہ پورٹ کی اسٹریٹجک اہمیت کو اجاگر کرتا ہے، جو نہ صرف یو اے ای بلکہ پورے خطے کے لیے ایک اہم تجارتی مرکز ہے۔ جدید ترین اناج ذخیرہ کرنے اور پروسیسنگ سہولت سے پورٹ کی صلاحیتوں میں مزید اضافہ ہوگا، جس سے مزید صارفین کو عالمی منڈیوں تک بلاتعطل رسائی حاصل ہو سکے گی۔ ہم العین ملز کے ساتھ ایک طویل اور کامیاب شراکت داری کے منتظر ہیں۔"
الحزا انویسٹمنٹ گروپ کے چیئرمین، جمال الحزا، نے اس شراکت داری کی اہمیت پر روشنی ڈالتے ہوئے کہاکہ یہ معاہدہ ہماری اس حکمت عملی کی عکاسی کرتا ہے، جس کے تحت ہم اپنی فوڈ انڈسٹری میں مہارت کو ابوظبی پورٹس کے لاجسٹکس اور سپلائی چین کے شعبے میں شاندار صلاحیتوں کے ساتھ یکجا کر رہے ہیں۔ اس شراکت داری کے ذریعے نہ صرف غذائی تحفظ کو تقویت ملے گی بلکہ عالمی معیار کے مطابق انفراسٹرکچر کی ترقی کو بھی فروغ دیا جائے گا۔
العین ملز کے سی ای او، عبداللہ الحزا، نے کہاکہ، "یہ تعاون جدت اور اعلیٰ کارکردگی کے نئے دروازے کھولے گا، جس سے مقامی صنعت کو فروغ ملے گا اور قومی ترقی کے اہداف کو سپورٹ کرنے میں مدد ملے گی۔ ہم اس کامیاب شراکت داری میں اپنا حصہ ڈالنے والے تمام افراد کے شکر گزار ہیں اور مستقبل میں مزید کامیابیاں حاصل کرنے کے منتظر ہیں۔"
یہ نئی سہولت متحدہ عرب امارات کے غذائی تحفظ کے اقدامات کی حمایت میں ایک اہم کردار ادا کرے گی، جبکہ خطے میں اقتصادی ترقی کے فروغ میں بھی مددگار ثابت ہوگی۔
اس منصوبے سے نئی ملازمتوں کے مواقع پیدا ہوں گے، تجارتی سرگرمیوں کو فروغ ملے گا جبکہ خلیجی خطے میں اعلیٰ معیار کی غذائی مصنوعات کی دستیابی کو یقینی بنایا جائے گا۔
یہ شراکت داری متحدہ عرب امارات کو خطے میں خوراک کی پروسیسنگ اور لاجسٹکس کے لیے ایک عالمی مرکز کے طور پر مزید مستحکم کرے گی۔