ابوظہبی، 17 فروری 2025 (وام) – ابوظہبی میں منعقدہ نیوڈیکس کے آٹھویں ایڈیشن نے بحری دفاع اور سلامتی کے بین الاقوامی شعبے میں اپنی قیادت کو مزید مستحکم کر دیا ہے۔
نیوڈیکس 2025 دنیا بھر کے کلیدی صنعتی اداروں، فیصلہ سازوں، اثر و رسوخ رکھنے والی شخصیات اور بحری دفاع کے ماہرین کو ایک پلیٹ فارم پر اکٹھا کر رہا ہے، جہاں بحری شعبے کے مستقبل کے حوالے سے تبادلہ خیال کیا جا رہا ہے۔
نیوڈیکس 2025 میں دنیا بھر سے جدید بحری دفاعی ٹیکنالوجیز کی نمائش کی جا رہی ہے اور اس شعبے میں ہونے والی جدید تکنیکی ترقی کا جائزہ لیا جا رہا ہے۔ نمائش میں بحری جہازوں اور جدید ٹیکنالوجیز کے عملی مظاہرے کیے جا رہے ہیں، جبکہ ابوظہبی کے ایڈنیک مرینا میں دنیا بھر کے جنگی جہاز موجود ہیں۔
اس سال کی نمائش میں آٹھ ممالک کے بحری بیڑے شامل ہیں، جن میں متحدہ عرب امارات، بحرین، عمان، برطانیہ، پاکستان، یونان، جنوبی کوریا اور بھارت شامل ہیں۔
نیوڈیکس عالمی بحری دفاع اور سلامتی کے شعبے کے لیے ایک خصوصی پلیٹ فارم فراہم کرتا ہے، جہاں اسٹریٹجک تعاون، علمی تبادلے اور جدید بحری دفاعی ٹیکنالوجیز کی نمائش کے مواقع دستیاب ہیں۔
نیوڈیکس 2025 میں "نیودیکس ٹاکس" کے نام سے ایک سلسلہ متعارف کرایا گیا ہے، جس میں ماہرین اور اسپیشلسٹ ابھرتے ہوئے رجحانات، حقیقی دنیا کے کیس اسٹڈیز اور بحری دفاعی ٹیکنالوجی میں جدید پیش رفت پر گفتگو کریں گے۔
نمائش میں شرکت کرنے والے اداروں کو اپنے بحری جہاز ایک مخصوص پانی کے علاقے میں پیش کرنے کا منفرد موقع فراہم کیا جا رہا ہے، جہاں عارضی مرینا اور فلوٹنگ ڈوکس کی سہولت موجود ہے۔
نیودیکس 2025 میں روزانہ کی بنیاد پر لائیو مظاہروں کا شیڈول ترتیب دیا گیا ہے، جس میں نمائش کنندگان خود اپنے جدید دفاعی حل کا عملی مظاہرہ کریں گے۔ اس دوران، گرینڈ اسٹینڈ کے مہمان واٹر فرنٹ کے ساتھ جدید بحری ٹیکنالوجیز اور صلاحیتوں کے شاندار مظاہروں کا قریب سے مشاہدہ کر سکیں گے۔