جنیوا، 27 فروری 2025 (وام) – اقوام متحدہ کے انسانی حقوق کے سربراہ، وولکر ترک کے مطابق مقبوضہ فلسطینی علاقوں میں بحران ایک "نازک موڑ" پر پہنچ چکا ہے۔
جنیوا میں انسانی حقوق کونسل سے خطاب کرتے ہوئے، ترک نے کہا کہ ایک نازک جنگ بندی نے غزہ کی عوام کو سانس لینے کا موقع فراہم کیا ہے، اسرائیلی یرغمالیوں اور فلسطینی قیدیوں کی رہائی ممکن ہوئی ہے، اور زندگی بچانے والی انسانی امداد کی ترسیل جاری ہے۔
انہوں نے کہاکہ، "اس نازک لمحے میں، دنیا کو خود سے یہ سوال کرنا ہوگا کہ اس دہائیوں پرانے تنازع کو کیسے حل کیا جائے اور تشدد کے اس دائرے کو کیسے روکا جائے۔" انہوں نے اس بات پر زور دیا کہ کسی بھی بہتر مستقبل کے منصوبے کو ماضی کے مظالم کا ازالہ کرنا ہوگا، اور اس کے لیے احتساب اور انصاف بنیادی حیثیت رکھتے ہیں۔
ترک نے نشاندہی کی کہ غزہ اور مغربی کنارے، بشمول مشرقی یروشلم کے عوام، دہائیوں سے اسرائیلی قبضے میں رہ رہے ہیں اور ان کے بنیادی حقوق سے محروم ہیں۔ انہوں نے غزہ میں 48,000 سے زائد افراد کی ہلاکتوں کا حوالہ دیا، جن میں اکثریت خواتین اور بچوں کی تھی، جبکہ 1,054 سے زائد طبی کارکنوں کی ہلاکت اور وسیع پیمانے پر بنیادی ڈھانچے کی تباہی پر بھی روشنی ڈالی۔
انہوں نے بتایا کہ بین الاقوامی انسانی قانون کے اصولوں کی بے مثال خلاف ورزی دیکھنے میں آئی ہے جبکہ جنگی جرائم کے ارتکاب پر گہری تشویش کا اظہار کیا۔
اقوام متحدہ کے اعلیٰ کمشنر نے تمام خلاف ورزیوں کی آزادانہ تحقیقات کا مطالبہ کیا اور بین الاقوامی عدالتِ انصاف کے فیصلے کے مطابق، مقبوضہ فلسطینی علاقوں میں اسرائیل کی "غیر قانونی موجودگی" کے خاتمے کی ضرورت پر زور دیا۔
ترک نے کہا کہ "جنگ بندی کے ہر مرحلے کو نیک نیتی اور مکمل طور پر نافذ کیا جانا چاہیے۔ ہم سب کو اس پر عملدرآمد کو یقینی بنانے کے لیے ہر ممکن اقدام کرنا ہوگا۔"