نیویارک، 4 مارچ 2025 (وام) – متحدہ عرب امارات اور سینیگال، جو 2026 یو این واٹر کانفرنس کے مشترکہ میزبان ہیں، نے 3 مارچ 2025 کو نیویارک میں اقوام متحدہ کے ہیڈکوارٹر میں کانفرنس کے تنظیمی اجلاس کا انعقاد کیا۔
ستمبر 2024 میں منظور کیے گئے کانفرنس کے ضابطوں کے مطابق، یہ اجلاس رکن ممالک اور اسٹیک ہولڈرز کو چھ بین الاقوامی مکالموں کے موضوعات پر اپنی آراء اور سفارشات پیش کرنے کا موقع فراہم کرنے کے لیے ترتیب دیا گیا تھا۔ یہ مکالمے عالمی سطح پر پانی کے چیلنجز سے نمٹنے اور پائیدار ترقی کے ہدف 6 (SDG 6) – تمام افراد کے لیے پانی اور صفائی کی دستیابی اور پائیدار انتظام – کے نفاذ میں پیشرفت کو تیز کرنے پر مرکوز ہوں گے۔
اجلاس کا آغاز اعلیٰ سطحی تقاریر سے ہوا، جن میں متحدہ عرب امارات کے معاون وزیر خارجہ برائے توانائی و پائیداری، عبداللہ احمد بلعلہ، اور سینیگال کے وزیر برائے ہائیڈرولکس اور صفائی، شیخ تیڈیانے دیئے نے خطاب کیا۔ رہنماؤں نے 2026 کانفرنس کو ایک مؤثر اور نتیجہ خیز اجتماع بنانے کے لیے جامع اور مشترکہ تیاری کے عمل پر زور دیا۔
عبداللہ احمد بلعلہ نے کہاکہ، "متحدہ عرب امارات کے لیے پانی ہماری تاریخ، حال اور مستقبل کی تشکیل کرتا ہے۔ ہم عالمی سطح پر پانی سے متعلق اختراعی اور جامع اقدامات کو فروغ دینے کے لیے پرعزم ہیں، تاکہ علم کے تبادلے، بین الاقوامی تعاون، سرمایہ کاری کے فروغ اور ٹیکنالوجی کے استعمال کو بڑھایا جا سکے۔"
اس موقع پر شیخ تیڈیانے دیئے نے کہاکہ، "2026 یو این واٹر کانفرنس انسانیت کے لیے ایک اہم موقع ہے، جہاں ہم اپنے مستقبل کے ساتھ ایک تاریخی ملاقات کریں گے۔ اب غور و فکر یا سفارشات کا وقت نہیں، بلکہ عمل کرنے کا وقت ہے۔ ہمیں اس بات کو یقینی بنانا ہوگا کہ یہ عمل جامع اور شراکتی ہو، تاکہ ہر آواز اور ہر نقطہ نظر کو سنا جا سکے۔"
اقوام متحدہ کی حالیہ رپورٹس کے مطابق، دنیا بھر میں 2.2 ارب افراد کو اب بھی صاف پانی دستیاب نہیں، 3.5 ارب افراد محفوظ طریقے سے منظم صفائی کی سہولیات سے محروم ہیں، اور 4 ارب افراد سال میں کم از کم ایک ماہ شدید پانی کی قلت کا سامنا کرتے ہیں۔
اس اجلاس میں اقوام متحدہ کے محکمہ اقتصادی و سماجی امور (UN DESA) کے انڈر سیکرٹری جنرل لی جنہوا، یو این واٹر کے چیئرمین الوارو لاریو، اور 72 مندوبین نے شرکت کی، جن میں اقوام متحدہ کے اداروں، غیر سرکاری تنظیموں، سول سوسائٹی اور نجی شعبے کے 26 نمائندے شامل تھے۔
اجلاس کے بعد، اقوام متحدہ کا اقتصادی و سماجی امور کا محکمہ (UN DESA)، جو کانفرنس کا سیکریٹریٹ ہے، موضوعات پر ایک پسِ منظر نوٹ تیار کرے گا، جس پر رکن ممالک اور متعلقہ اقوام متحدہ کے اداروں سے مشاورت کی جائے گی۔
9 جولائی 2025 کو اقوام متحدہ کی جنرل اسمبلی کے صدر کی زیرِ صدارت ایک روزہ اجلاس میں ان موضوعات کو حتمی شکل دی جائے گی، جس کے بعد دسمبر میں ہونے والی کانفرنس سے قبل ایک اعلیٰ سطحی تیاری اجلاس ڈکار میں منعقد کیا جائے گا۔