عجمان، 13 مارچ، 2025 (وام) – عجمان یونیورسٹی نے QS ورلڈ یونیورسٹی رینکنگ برائے مضامین 2025 میں ڈیٹا سائنس اور مصنوعی ذہانت کے شعبے میں دنیا کی ٹاپ 51-100 جامعات میں اپنی جگہ بنا لی ہے۔
یہ کامیابی عجمان یونیورسٹی کو متحدہ عرب امارات میں اس شعبے میں پہلے نمبر پر اور ملک کی واحد نمائندہ یونیورسٹی کے طور پر نمایاں کرتی ہے۔
علاوہ ازیں، یونیورسٹی نے فارمیسی اور فارماکولوجی میں عالمی سطح پر 151-200 رینکنگ حاصل کی اور اس شعبے میں بھی متحدہ عرب امارات میں پہلی پوزیشن حاصل کی۔
یونیورسٹی نے کمپیوٹر سائنس اور انفارمیشن سسٹمز، اور ریاضی میں دنیا کی ٹاپ 201-250 جامعات میں جگہ بنائی، جبکہ متحدہ عرب امارات میں دونوں شعبوں میں دوسری پوزیشن حاصل کی۔ اسی طرح، اکاؤنٹنگ اور فنانس میں عالمی سطح پر 251-300 رینکنگ حاصل کی۔
جامعہ عجمان نے وسیع تر موضوعاتی درجہ بندی میں بھی نمایاں بہتری دکھائی اور کچھ مضامین میں 200 درجے تک ترقی کی۔
سوشل سائنسز اور مینجمنٹ میں، عجمان یونیورسٹی نے عالمی سطح پر 284ویں پوزیشن حاصل کی، جو پچھلے سال 451-500 کی درجہ بندی سے ایک بڑی بہتری ہے۔ اس شعبے میں یونیورسٹی اب متحدہ عرب امارات میں تیسرے نمبر پر آ گئی ہے۔
عجمان یونیورسٹی کے چانسلر ڈاکٹر کریم سیغیر نے کہاکہ،“عجمان یونیورسٹی کی QS ورلڈ یونیورسٹی رینکنگ میں شاندار کارکردگی بے مثال ترقی کی کہانی ہے۔ ہم نے گزشتہ چند سالوں میں نمایاں ترقی کی ہے، اور آج دنیا کی ٹاپ 100 جامعات میں ڈیٹا سائنس اور مصنوعی ذہانت میں شامل ہونا ہمارے لیے ایک بڑی کامیابی ہے۔”