ابوظہبی، 18 مارچ، 2025 (وام) – ابوظہبی کے ولی عہد اور ابوظہبی ایگزیکٹو کونسل کے چیئرمین، عزت مآب شیخ خالد بن محمد بن زاید النہیان نے کلیولینڈ کلینک ابوظہبی کی 10ویں سالگرہ کی تقریب میں شرکت کی۔ یہ تقریب امارات پیلس منڈارن اورینٹل میں منعقد ہوئی، جس میں اعلیٰ حکام اور عالمی طبی ماہرین کی نمایاں شخصیات نے شرکت کی۔
اس تقریب کے دوران کلیولینڈ کلینک ابوظہبی کے سفر اور کامیابیوں کو اجاگر کیا گیا، جنہوں نے متحدہ عرب امارات کے صحت کے شعبے کی ترقی میں نمایاں کردار ادا کیا ہے۔
شیخ خالد بن محمد بن زاید النہیان نے متحدہ عرب امارات کی قیادت کی جانب سے صحت، تحقیق اور ترقی کے شعبے میں دی جانے والی اہمیت پر روشنی ڈالی۔ انہوں نے کہا کہ قیادت کا وژن جدید طبی سہولتوں اور طبی اختراعات کو فروغ دے کر عالمی معیار کے مطابق صحت کی دیکھ بھال کے نظام کو مزید بہتر بنانے پر مرکوز ہے۔
انہوں نے کلیولینڈ کلینک ابوظہبی کے کردار کی بھی تعریف کی، جس نے عالمی معیار کی طبی خدمات، جدید ٹیکنالوجی کے استعمال، بین الاقوامی طبی ماہرین کی شمولیت، اور تحقیق و ترقی کے میدان میں نمایاں کارنامے انجام دیے۔
شیخ خالد نے مزید کہا کہ یہ کوششیں ابوظہبی کو ایک کلیدی عالمی طبی مرکز بنانے میں مدد دے رہی ہیں، جہاں بین الاقوامی صحت کی تنظیمیں اور ادارے سرمایہ کاری کرنے کے خواہاں ہیں۔
تقریب کے دوران، کلیولینڈ کلینک ابوظہبی کے 100 سالہ عالمی شہرت یافتہ کلیولینڈ کلینک ہیلتھ سسٹم کے تسلسل کے طور پر کردار کو اجاگر کیا گیا۔
اس موقع پر، حسن جاسم النوئیس، چیئرمین کلیولینڈ کلینک ابوظہبی، نے کہا کہ، "ہم اس اہم سنگ میل کے موقع پر عزت مآب شیخ محمد بن زاید النہیان، صدرِ متحدہ عرب امارات، کے وژن کو خراج تحسین پیش کرتے ہیں، جنہوں نے عالمی معیار کی پیچیدہ طبی دیکھ بھال کو متحدہ عرب امارات تک پہنچانے کے لیے جرات مندانہ اقدامات کیے۔ صرف 10 سال کے عرصے میں ان کا وژن حقیقت بن چکا ہے، جو نہ صرف خطے بلکہ عالمی سطح پر صحت کے شعبے میں مثبت تبدیلی لا رہا ہے۔"
کلیولینڈ کلینک کے صدر اور سی ای او، ڈاکٹر ٹام میہالیویچ نے کہاکہ، "میری نظر میں، صحت کی تاریخ میں کوئی ایسی مثال نہیں جہاں صرف 10 سال کے عرصے میں کلیولینڈ کلینک ابوظہبی جیسی کامیابیاں حاصل کی گئی ہوں۔ ہم نے ثابت کر دیا ہے کہ کلیولینڈ کلینک کی طبی سہولیات دنیا کے کسی بھی حصے میں زندگیوں کو بہتر بنا سکتی ہیں۔"
کلیولینڈ کلینک ابوظہبی کے سی ای او، ڈاکٹر جارج پاسکل ہابر نے کہاکہ،"گزشتہ 10 سالوں میں، کلیولینڈ کلینک ابوظہبی نے عالمی معیار کی مہارت، طبی اختراعات، اور ہمدردانہ دیکھ بھال کے ذریعے خطے میں صحت کی سہولیات کو نئی جہت دی ہے۔ یہ کامیابی قیادت کے وژن، مریضوں کے اعتماد، اور ہمارے ماہر طبی عملے کی انتھک محنت کی بدولت ممکن ہوئی ہے۔ ہم مستقبل میں مزید ترقی، اعلیٰ طبی معیارات کے فروغ، اور آنے والی نسلوں کے لیے ایک پائیدار صحت کا نظام قائم کرنے کے لیے پرعزم ہیں۔"