ابوظہبی، 24 مارچ، 2025 (وام) – ابو ظہبی کی کمپنی "السیر میرین" اور "ڈامن انٹرنیشنل" نے مشترکہ طور پر اعلان کیا ہے کہ انہوں نے "توازن کونسل" کے ساتھ ایک اہم معاہدہ حاصل کیا ہے جس کے تحت 1.3 ارب درہم مالیت کے جدید آف شور پٹرول ویسلز (OPVs) تیار کیے جائیں گے۔
یہ چار سالہ منصوبہ امارات کی بحری قوت کو مضبوط بنانے اور سمندری سلامتی کو بہتر بنانے میں اہم کردار ادا کرے گا۔ یہ جہاز جدید ٹیکنالوجی سے لیس ہوں گے اور ان میں کئی اہم خصوصیات شامل ہوں گی۔
یہ گشتی جہاز خصوصی اقتصادی زون کی نگرانی، قزاقی، اسمگلنگ اور ماحولیاتی تحفظ جیسے چیلنجز سے نمٹنے، سمندری قوانین کے نفاذ، کوسٹ گارڈ کے کام، تلاش و بچاؤ کی کارروائیوں اور قدرتی آفات میں امداد جیسے مختلف مشن انجام دینے کی صلاحیت رکھتے ہیں۔
اس موقع پر السیر میرین کے سی ای او، گائے نیوینز نے کہاکہ، "توازن کونسل کا اعتماد ہمارے جہاز سازی کے تجربے اور مضبوط تکنیکی مہارت کا اعتراف ہے۔ ہم مقامی طور پر عالمی معیار کے جدید جہاز تیار کرنے کے ساتھ ساتھ مکمل لاجسٹک سپورٹ بھی فراہم کریں گے تاکہ قومی سلامتی کے مقاصد کو حاصل کیا جا سکے۔"
معاہدے میں ایک جامع "انٹیگریٹڈ لاجسٹک سپورٹ" (ILS) پیکج بھی شامل ہے، جو ان جہازوں کی مرمت، عملے کی تربیت، پرزوں کی دستیابی اور پرانی ٹیکنالوجی کی بروقت تبدیلی کو یقینی بنائے گا۔
یہ اہم شراکت داری نہ صرف امارات کی دفاعی صنعت کو مضبوط کرے گی بلکہ ملک کی سمندری سرحدوں کی حفاظت اور قومی مفادات کے تحفظ میں بھی نمایاں کردار ادا کرے گی۔