ابوظہبی، 1 اپریل 2025 (وام) – دنیا کے سرکردہ جدید ٹیکنالوجی اور دفاعی اداروں میں شمار ہونے والے ایج گروپ نے اپنی ذیلی کمپنی 'ORYXLABS' کے ذریعے ’’UNMASK‘‘ کے نام سے ایک جدید سائبر سیکیورٹی حل متعارف کرا دیا ہے۔ یہ حل عالمی سطح پر اداروں کو اپنی ڈیجیٹل نیٹ ورکس کی نگرانی، سیکیورٹی اور کارکردگی بہتر بنانے میں مدد فراہم کرنے کے لیے تیار کیا گیا ہے۔
'UNMASK' کو خاص طور پر قانون نافذ کرنے والے اداروں اور قومی سلامتی سے متعلق تنظیموں کی معاونت کے لیے تیار کیا گیا ہے تاکہ وہ ان آن لائن خطرات کا سراغ لگا سکیں جو ڈیجیٹل گمنامی کی آڑ میں چھپ کر کیے جاتے ہیں۔
جیسے جیسے خفیہ پیغام رسانی اور گمنام آن لائن پلیٹ فارمز کا غلط استعمال بڑھتا جا رہا ہے، سیکیورٹی ادارے ڈیجیٹل دنیا میں درپیش خطرات سے نمٹنے میں نئی مشکلات کا سامنا کر رہے ہیں۔ 'UNMASK' ان اداروں کو ایسی مستند معلومات فراہم کرتا ہے جو انہیں خطرناک سرگرمیوں کا پتا لگانے اور سائبر سیکیورٹی مضبوط کرنے میں مدد دیتی ہیں۔
یہ حل اداروں کو ڈارک ویب پر مجرمانہ سرگرمیوں کی شناخت، خفیہ اقدامات کی نگرانی، اور ابھرتے ہوئے سائبر خطرات کو بروقت اور درست طریقے سے ناکام بنانے کی صلاحیت دیتا ہے۔
ORYXLABS کے چیف ایگزیکٹو آفیسر، راجیریو لیموس نے کہاکہ، "UNMASK موجودہ ڈیجیٹل سیکیورٹی منظرنامے میں ایک اہم اور بڑھتی ہوئی ضرورت کو پورا کرتا ہے۔ ہم سیکیورٹی اداروں کو پیچیدہ آن لائن ماحول میں گہری بصیرت دے کر ڈیجیٹل جرائم سے نمٹنے میں زیادہ مؤثر، تیز اور باخبر فیصلے لینے میں مدد دے رہے ہیں، وہ بھی اعلیٰ ترین اخلاقی اور سیکیورٹی معیار کو برقرار رکھتے ہوئے۔"
'UNMASK' نہایت آسانی سے نافذ کیا جا سکتا ہے اور اس کی وسیع فعالیت اسے اداروں کے لیے ایک جامع حل بناتی ہے، جو نہ صرف موجودہ بلکہ مستقبل کے سائبر حملوں سے بچاؤ میں بھی مددگار ہے۔ یہ 'ORYXLABS' کے بڑھتے ہوئے انٹیلی جنس اور سائبر سیکیورٹی پورٹ فولیو کا حصہ ہے، جو مسلسل خطرات کی نگرانی اور تجزیے کے لیے تیار کیا گیا ہے۔