ابوظبی، 30 اپریل، 2025 (وام) --متحدہ عرب امارات کی امدادی ایجنسی نے دبئی انٹرنیشنل ہیومنیٹیرین ایڈ اینڈ ڈیولپمنٹ کانفرنس اینڈ ایگزیبیشن (DIHAD 2025) کے موقع پر اپنے اسٹریٹجک شراکت داروں کے ہمراہ ایک گول میز اجلاس منعقد کیا، جس کا مقصد عالمی سطح پر انسانی، ترقیاتی اور فلاحی چیلنجز کے لیے جدید اور پائیدار حل تلاش کرنا تھا۔
اجلاس کا بنیادی ہدف عالمی امدادی اداروں کے درمیان تعاون و ہم آہنگی کو فروغ دینا اور امدادی سرگرمیوں کی مؤثر اور بروقت فراہمی کو یقینی بنانا تھا۔
اجلاس میں شریک بین الاقوامی و علاقائی شراکت داروں نے باہمی تعاون کے فریم ورک کو بہتر بنانے، طریقہ کار کو مزید فعال بنانے، اور امدادی اشیاء و خدمات کو ضرورت مند افراد تک جلد از جلد پہنچانے کی اہمیت پر زور دیا۔
شرکاء نے اس بات پر اتفاق کیا کہ عالمی امدادی ترجیحات کو نہ صرف مشترکہ انسانی اہداف بلکہ مقامی کمیونٹیز کی مخصوص ضروریات سے بھی ہم آہنگ ہونا چاہیے تاکہ زیادہ مؤثر نتائج حاصل کیے جا سکیں۔
اجلاس کے دوران تعلیم، صحت، بنیادی ڈھانچے کی ترقی، غربت کے خاتمے، غذائی قلت، صاف پانی تک رسائی، عالمی صحت کے خطرات اور موسمیاتی تبدیلی جیسے اہم شعبوں میں امدادی و ترقیاتی اقدامات کو تیز کرنے پر بھی زور دیا گیا۔