کویت، 11 مئی، 2025 (وام)--متحدہ عرب امارات کی قومی اولمپک کمیٹی کے صدر عزت مآب شیخ منصور بن محمد بن راشد آل مکتوم کی قیادت میں اماراتی وفد نے خلیجی تعاون کونسل (جی سی سی) کے ممالک کی اولمپک کمیٹیوں کے صدور کے 37ویں اجلاس میں شرکت کی، جو کویت میں منعقد ہوا۔
اماراتی وفد میں وزیر کھیل، قومی اولمپک کمیٹی کے نائب صدر اور ایگزیکٹو آفس کے چیئرمین ڈاکٹر احمد بلیہول الفلاسی؛ کویت میں یو اے ای کے سفیر ڈاکٹر مطر حامد النیادی؛ قومی اولمپک کمیٹی کے سیکرٹری جنرل فارس محمد المطوع؛ اور بورڈ ممبرنورا حسن الجسمي شامل تھے۔
اجلاس میں 2026 میں اسپورٹس لاء اینڈ مینجمنٹ کانفرنس کی میزبانی کے لیے یو اے ای کی تجویز کی منظوری دی گئی، جو کہ قومی اولمپک کمیٹی کی جانب سے پیش کردہ موضوعات پر مبنی ہوگی۔ کانفرنس میں اولمپک چارٹر، ڈیجیٹل دور میں اسپورٹس مینجمنٹ، اسپورٹس قانون سازی کا مستقبل، کھیلوں میں تنازعات کے حل، سرمایہ کاری و شفافیت، اور اولمپک چارٹر کے تحت قانونی چیلنجز جیسے اہم موضوعات شامل ہوں گے۔
اجلاس میں جی سی سی ممالک کو کانفرنس میں تحقیقی مقالے اور کیس اسٹڈیز پیش کرنے کی ترغیب دینے پر بھی اتفاق ہوا، تاکہ خطے کے بہترین قانونی و انتظامی تجربات کو پیش کیا جا سکے۔ اس کے علاوہ کانفرنس کے مالیاتی ماڈل اور نجی و سرکاری اداروں کے ساتھ شراکت داری کے امکانات پر بھی غور کیا گیا، جبکہ جدید ٹیکنالوجی کے استعمال جیسے انٹرایکٹو ایپلی کیشنز، لائیو اسٹریمنگ، اور ڈیجیٹل پلیٹ فارمز کے ذریعے وسیع تر شرکت کو یقینی بنانے پر زور دیا گیا۔
اجلاس میں فیصلہ کیا گیا کہ آئندہ جی سی سی اولمپک کمیٹیوں کے صدور کے 38ویں اجلاس کی میزبانی اور تاریخ کا تعین یو اے ای کرے گا، جو کہ موجودہ مدت کے لیے صدارت بھی کرے گا، اور اس سے قبل ایگزیکٹو آفس کا اجلاس بھی منعقد ہوگا۔
اجلاس میں تیسرے جی سی سی بیچ گیمز کی حتمی رپورٹ کا جائزہ لینے کے لیے ایگزیکٹو آفس اور متعلقہ کمیٹیوں کو ہدایت دی گئی، تاکہ اس کے تکنیکی و تنظیمی پہلوؤں کا تجزیہ کر کے سفارشات مرتب کی جا سکیں۔
چوتھے جی سی سی اسپورٹس گیمز 2026 کی میزبانی قطر کو دی گئی، جبکہ کویت کو 2028 میں دوسرے جی سی سی یوتھ گیمز کی میزبانی کی منظوری دی گئی، جس میں عمر سے متعلق تکنیکی اصولوں کی سخت پابندی پر زور دیا گیا۔ اجلاس میں خواتین کی شرکت کو فروغ دینے، کھیلوں کے ساتھ تعلیمی و ثقافتی پروگرام شامل کرنے اور جی سی سی خواتین کھیلوں کے مشترکہ ڈیجیٹل پلیٹ فارم کی افادیت بڑھانے پر بھی زور دیا گیا۔
اجلاس میں جی سی سی خواتین کھیلوں کے ہیکاتھون کو ایک سالانہ یا باقاعدہ پروگرام کے طور پر منظم کرنے کی منظوری دی گئی، تاکہ اس شعبے میں اختراع اور علم کا تبادلہ فروغ پائے۔ شرکاء کو تربیتی مواقع، ورکشاپس اور مشاورتی اجلاسوں کی سہولت فراہم کی جائے گی، اور کامیاب منصوبوں کو جی سی سی سطح پر نافذ کیا جائے گا۔
بعد ازاں، شیخ منصور بن محمد نے شیخ جابر الاحمد کلچرل سینٹر میں منعقدہ ایک ثقافتی اور لوک ورثہ تقریب میں بھی شرکت کی۔