ابوظہبی، 22 مئی، 2025 (وام)--ادنوک لاجسٹکس اینڈ سروسز (ادنوک L&S) کے سی ای او، کپتان عبدالکریم الماسبی نے کہا ہے کہ کمپنی اماراتی معیشت کے تنوع سے متعلق قومی وژن کے مطابق صنعتی مہارت کے فروغ اور مقامی صلاحیتوں کو بااختیار بنانے میں اہم کردار ادا کر رہی ہے۔
انہوں نے ان خیالات کا اظہار ابوظبی میں جاری "میک اِٹ ان دی ایمریٹس" فورم کے موقع پر وام سے گفتگو کرتے ہوئے کیا۔ الماسبی نے ادنوک L&S کی اس قومی پلیٹ فارم میں پہلی شرکت پر فخر کا اظہار کیا اور واضح کیا کہ کمپنی مقامی مینوفیکچرنگ اور صنعتی اختراع کو فروغ دینے کے لیے پرعزم ہے۔
انہوں نے انکشاف کیا کہ ادنوک L&S نے متحدہ عرب امارات میں 31 جہازوں کی تیاری کا حکم دیا ہے، جس کے نتیجے میں 300 سے زائد روزگار کے مواقع پیدا ہوئے اور ملک کی صنعتی بنیاد کو مستحکم کیا گیا۔ یہ جہاز عملے اور سامان کی نقل و حمل کے ساتھ ساتھ آف شور لاجسٹک سپورٹ کی فراہمی میں مصروفِ عمل ہیں، جو مقامی پیداوار اور آپریشنل صلاحیت میں اضافے کی علامت ہیں۔
المسابی نے بتایا کہ صرف 2024 میں ادنوک L&S نے قومی معیشت میں تقریباً 1 ارب درہم کا اِن کنٹری ویلیو (ICV) شامل کیا، جس سے مقامی و وفاقی اداروں کے ساتھ مسلسل تعاون کا ثبوت ملتا ہے۔
انہوں نے واضح کیا کہ کمپنی کا کردار صرف معاشی ترقی تک محدود نہیں بلکہ جدید ٹیکنالوجی اور مصنوعی ذہانت (AI) کے انضمام پر بھی مرکوز ہے۔ انہوں نے بتایا کہ ادنوک L&S نے AIQ (ادنوک اور جی42 کی مشترکہ سرمایہ کاری) کے ساتھ شراکت سے 'SMARTi' نظام متعارف کرایا ہے، جو ریئل ٹائم نگرانی، خطرات کی نشاندہی اور رپورٹنگ کی صلاحیت رکھتا ہے، اور صحت، تحفظ اور ماحولیاتی کارکردگی کو بہتر بناتا ہے۔
انہوں نے مزید کہا کہ کمپنی نے ریموٹ کنٹرول فورک لفٹ ٹیکنالوجی میں بھی سرمایہ کاری کی ہے، جس کا سافٹ ویئر مقامی کمپنی صناحہ ٹیکنالوجی کے ذریعے براہ راست ادنوک L&S کے آلات پر نصب کیا گیا، جو مقامی اختراع اور سمارٹ صنعتی حل کی ایک کامیاب مثال ہے۔
ادنوک L&S کے بیڑے میں کئی ایسے جہاز بھی شامل ہیں جو مقامی طور پر تیار کیے گئے ہیں، جیسے آئل اسپِل ریسپانس ویسلز، جو سمندری ماحولیاتی تحفظ اور آپریشنل سیفٹی کے لیے نہایت اہمیت رکھتے ہیں۔
انہوں نے بتایا کہ ادنوک L&S کا مقامی جہاز سازی کمپنیوں کے ساتھ تعاون، جیسے المنزل میرین، البواردی ڈیمن، ابو ظبی شپ بلڈنگ، گرینڈ ویلڈ اور پریمیئر میرین انجینئرنگ سروسز، قومی صنعت کے فروغ اور میری ٹائم انفراسٹرکچر کی جدید کاری کے لیے کمپنی کے اسٹریٹجک عزم کی واضح مثال ہے۔
انہوں نے یہ بھی بتایا کہ ادنوک L&S نے فورم میں ریجنٹ کمپنی کی تیار کردہ ونگ اِن گراؤنڈ ایفیکٹ سی گلائیڈر کی نمائش کی، جو مستقبل میں مقامی تیاری کے لیے متعارف کرائی جا رہی ہے۔ یہ ہائبرڈ ٹیکنالوجی پر مبنی ماڈل ہے جو جہاز اور ہوائی جہاز کی صلاحیتوں کو یکجا کرتا ہے اور کاربن اخراج میں نمایاں کمی کا ذریعہ بنے گا۔
المسابی نے ادنوک L&S کی "People First" حکمت عملی کو اجاگر کرتے ہوئے بتایا کہ کمپنی 11,000 سے زائد پیشہ ور افراد کو روزگار فراہم کر رہی ہے، جن میں 3,200 سے زائد سی فیئررز شامل ہیں۔
انہوں نے کہا کہ کمپنی اماراتی ٹیلنٹ کو بااختیار بنانے اور میرین انڈسٹری میں اگلی نسل کی تربیت کے لیے عملی، جہاز پر مبنی تربیتی پروگرامز چلا رہی ہے۔ 2024 میں 15 قومیتوں سے تعلق رکھنے والے 136 سے زائد شرکاء نے ان پروگرامز میں حصہ لیا، جن میں خواتین کی شرکت کل تعداد کا پانچواں حصہ رہی۔
انہوں نے اس بات کا اعادہ کیا کہ ادنوک L&S خواتین کی نمائندگی میں اضافے اور میری ٹائم کیریئرز میں ان کی شمولیت کو فروغ دینے کے لیے سرگرم عمل ہے۔