ابوظبی، 17 جون، 2025 (وام)--متحدہ عرب امارات کی وزارت سرمایہ کاری نے آج ایک اہم مشترکہ منصوبے کے معاہدے کی میزبانی کی، جس کے تحت ایک نئی کمپنی ٹیلَس پاور مینا کے قیام کا اعلان کیا گیا ہے۔ یہ کمپنی برقی گاڑیوں (EV) کے بنیادی ڈھانچے کی تیاری اور جدید ٹیکنالوجی میں شراکت داری کے لیے متحدہ عرب امارات میں قائم کی جا رہی ہے۔
وزارت سرمایہ کاری نے اس گرین فیلڈ سرمایہ کاری کی سہولت کاری میں کلیدی کردار ادا کیا ہے، جو قومی سرمایہ کاری حکمت عملی کے تحت پائیدار ٹیکنالوجی اور جدید صنعتی شعبوں میں سرمایہ کاری کو فروغ دینے کے حکومتی عزم کی عکاسی کرتا ہے۔ اس اقدام کا مقصد خاندانی کاروباروں کی ترقی کے ساتھ ساتھ متحدہ عرب امارات کو خطے میں جدید صنعت اور پائیدار ٹیکنالوجی کا مرکز بنانا ہے۔
یہ معاہدہ ٹیلَس پاور گلوب ہولڈنگ لمیٹڈ کے سی ای او مائیک کلیس اور سنگ فیملی انٹرپرائز مڈل ایسٹ کے سی ای او ماریئس کیاوولا کے درمیان دستخط ہوا۔ دستخط کی تقریب میں وزارت سرمایہ کاری کی قائم مقام اسسٹنٹ انڈر سیکریٹری حصہ الغریر، یو اے ای میں چائنا انوویشن سینٹر کے چیئرمین حمدان زکریا دولیح، ٹیلَس پاور کے شریک بانی یانسونگ لی، اور بن ہندی ہولڈنگ کے گروپ سی ای او محمد بن ہندی بھی شریک تھے۔
نئی قائم ہونے والی کمپنی تین اہم شراکت دار اداروں کے اشتراک سے وجود میں آئی ہے۔ ان میں شامل ہے بن ہندی ہولڈنگ، جو متحدہ عرب امارات کا ایک نمایاں سرمایہ کاری ادارہ ہے اور توانائی، نقل و حرکت اور صنعتی جدت جیسے شعبوں میں قومی صلاحیتوں کو فروغ دینے پر مرکوز ہے۔ دوسرا شراکت دار سنگ فیملی انٹرپرائز گروپ ہے، جو چین میں قائم ایک متحرک کاروباری اور خاندانی ادارہ ہے جو مختلف صنعتی و مالیاتی شعبوں میں سرگرم عمل ہے۔ تیسرے شراکت دار کے طور پر ٹیلَس پاور شامل ہے، جو ریاست کیلیفورنیا، امریکہ میں قائم ایک عالمی کمپنی ہے اور برقی گاڑیوں کے لیے چارجنگ انفراسٹرکچر تیار کرنے میں مہارت رکھتی ہے، جو امریکہ، یورپ، بھارت، چین، جنوبی امریکہ اور خلیجی ممالک سمیت دنیا بھر میں اپنی خدمات فراہم کرتی ہے۔
یہ شراکت داری نہ صرف متحدہ عرب امارات میں جدید EV چارجنگ حل کی مقامی تیاری کو فروغ دے گی بلکہ GCC خطے میں دو طرفہ "وہیکل-ٹو-گرڈ" ٹیکنالوجیز کے نفاذ کو تیز کرنے میں بھی معاون ہو گی۔
وزارت سرمایہ کاری کے انڈر سیکریٹری محمد عبدالرحمن الحاوی نے کہا کہ یہ معاہدہ مستقبل کی سرمایہ کاری کو فروغ دینے اور قومی ترجیحات سے ہم آہنگ ترقی یافتہ شعبہ جات میں سرمایہ کاری کے لیے وزارت کے اسٹریٹجک شراکت دار کے کردار کو ظاہر کرتا ہے۔
ٹیلَس پاور کے سی ای او مائیک کلیس نے کہا کہ یہ شراکت داری ان کی کمپنی کے عالمی دائرہ کار کو وسعت دینے میں ایک اہم سنگِ میل ہے، اور متحدہ عرب امارات کلین ٹیک اور اسمارٹ موبیلیٹی کے میدان میں ابھرتا ہوا مرکز بن چکا ہے۔
سنگ فیملی انٹرپرائز مڈل ایسٹ کے سی ای او ماریئس کیاوولا نے کہا کہ اس شراکت داری کے ذریعے متحدہ عرب امارات کو EV چارجنگ کے میدان میں عالمی مرکز بنایا جائے گا، اور یہاں تیار ہونے والی جدید ٹیکنالوجی دنیا بھر کو برآمد کی جائے گی۔
بن ہندی ہولڈنگ کے گروپ سی ای او محمد بن ہندی نے کہا کہ یہ منصوبہ خطے میں توانائی اور نقل و حرکت کے مستقبل کے لیے ایک پائیدار صنعتی بنیاد فراہم کرے گا۔
یہ معاہدہ قومی سرمایہ کاری حکمت عملی کے تحت جدید صنعتوں اور قابلِ تجدید توانائی جیسے ترجیحی شعبوں میں براہِ راست غیر ملکی سرمایہ کاری کو فروغ دینے کے مقصد سے ہم آہنگ ہے۔ یہ متحدہ عرب امارات کی قومی الیکٹرک وہیکل پالیسی کی بھی تائید کرتا ہے، جس کا ہدف 2050 تک EV اپنائے جانے کی شرح کو 50 فیصد تک پہنچانا ہے۔