شارجہ، 20 جون 2025 (وام)--شارجہ چیریٹی انٹرنیشنل کے چیئرمین، شیخ صقر بن محمد القاسمی نے اس بات پر زور دیا ہے کہ "تراحم برائے غزہ" مہم اور "آپریشن الفارس الشهم 3" میں حصہ لینا ایک مذہبی اور انسانی فریضہ ہے۔ انہوں نے ان اقدامات کو متحدہ عرب امارات کی قیادت میں جاری اس وسیع امدادی مہم کا حصہ قرار دیا، جس کا مقصد غزہ میں زندگی کو بحال کرنا اور متاثرین کو فوری ریلیف فراہم کرنا ہے۔
عالمی یومِ مہاجرین کے موقع پر جاری بیان میں بتایا گیا کہ شارجہ چیریٹی انٹرنیشنل نے اب تک تقریباً 1,16,000 امدادی پیکجز فراہم کیے ہیں، جن میں 32,000 سے زائد خوراکی راشن بیگ بے گھر خاندانوں کو تقسیم کیے گئے۔ سرد موسم میں حرارت کی کمی کو مدنظر رکھتے ہوئے 10,000 گرم کمبل اور ملبوسات بھی تقسیم کیے گئے۔
ادارے نے بچوں کی فوری ضروریات کا بھی خاص خیال رکھا، اور 1,728 شیر خوار دودھ کے پیکٹس فراہم کیے، جو مقامی منڈیوں سے ناپید ہو چکے تھے۔ تعلیم کی بحالی کے لیے 3,000 مکمل طور پر تیار اسکول بیگ بھی تقسیم کیے گئے۔
غزہ میں پانی کی قلت پر قابو پانے کے لیے شارجہ چیریٹی انٹرنیشنل نے پانی کے ٹینکروں کا انتظام کیا اور متعدد متاثرہ کنویں بحال کیے۔ حالیہ دنوں میں 12 نئے کنویں کھودنے کے لیے ایک امدادی مہم شروع کی گئی ہے، جس سے 3,12,000 سے زائد افراد مستفید ہوں گے۔
خوراک کی فراہمی کو یقینی بنانے کے لیے 20 فیلڈ کچن روزانہ کی بنیاد پر 45,000 افراد کو گرم کھانا فراہم کر رہے ہیں، جبکہ 10 روٹی پلانٹس روزانہ تقریباً 9,500 افراد کے لیے روٹی تیار کر رہے ہیں، تاکہ روٹی کی شدید کمی پر قابو پایا جا سکے۔
شیخ صقر نے اس بات پر زور دیا کہ یہ تمام اقدامات نہ صرف فوری ریلیف بلکہ طویل مدتی انسانی معاونت کا حصہ ہیں، جو متحدہ عرب امارات کے اس عالمی عزم کا مظہر ہیں کہ دنیا کے بحران زدہ علاقوں میں امید اور بحالی کی راہیں پیدا کی جائیں۔
انہوں نے عوام سے اپیل کی کہ غزہ کے لیے جاری امدادی اقدامات میں مستقل تعاون جاری رکھا جائے، کیونکہ یہ امداد نہ صرف مادی مدد فراہم کرتی ہے بلکہ یو اے ای کے عوام کی طرف سے یکجہتی اور امید کا پیغام بھی پہنچاتی ہے۔