بیجنگ، یکم جولائی 2025 (وام)--چین کے دارالحکومت بیجنگ میں اگست کے وسط میں ہونے والے ورلڈ ہیومینائڈ روبوٹ گیمز کیلئے دنیا بھر سے 30 سے زائد بین الاقوامی روبوٹ ٹیموں نے ابتدائی رجسٹریشن مکمل کر لی ہے۔
روبو کپ ایشیا پیسفک کنفیڈریشن کے بین الاقوامی امور کے ڈائریکٹر، جارڈن ژاؤ کے مطابق، امریکہ، برازیل، جرمنی، نیدرلینڈز، اٹلی، پرتگال، جاپان، سنگاپور، آسٹریلیا، متحدہ عرب امارات اور انڈونیشیا سمیت مختلف ممالک کی روبوٹ فٹبال ٹیمیں مقابلے میں حصہ لینے کیلئے نام درج کرا چکی ہیں۔
چائنا ڈیلی کی رپورٹ کے مطابق، یہ مقابلے روبو کپ ایشیا پیسفک بیجنگ ماسٹرز کے تحت منعقد کیے جائیں گے، جو ورلڈ ہیومینائڈ روبوٹ گیمز کا سرکاری فٹبال ایونٹ تصور کیا جا رہا ہے۔ یہ تقریب 15 سے 18 اگست تک بیجنگ کے نیشنل اسپیڈ اسکیٹنگ اوول میں منعقد ہو گی۔
ژاؤ نے کہا ہے کہ بین الاقوامی ٹیمیں جدید الگوردمز پر مبنی مہارتیں لائیں گی، جس سے میچز کی دلچسپی اور مقابلے کا معیار مزید بلند ہو گا۔
شرکت کرنے والی ٹیموں میں نیدرلینڈز کی ٹیک یونیٹڈ آئندھوون کو روبو کپ کی تاریخ کی سب سے کامیاب ٹیموں میں شمار کیا جاتا ہے، جس نے اب تک آٹھ عالمی چیمپئن شپ جیت رکھی ہیں۔
گزشتہ سال، چینی کمپنیوں بوسٹر روبوٹکس، فوریئر انٹیلیجنس اور یونٹری روبوٹکس نے پہلی بار روبو کپ لیگ پارٹنرز کی حیثیت حاصل کی، جو اس عالمی روبوٹ پلیٹ فارم میں ان کی تاریخی شمولیت ہے۔
بیجنگ میونسپل بیورو آف اسپورٹس کے عہدیدار اور آرگنائزنگ کمیٹی کے مقابلہ جاتی امور کے ڈائریکٹر، ژانگ ہوا کے مطابق، اس سال کے مقابلوں میں نئے ایونٹس بھی شامل کیے گئے ہیں، جن میں مارشل آرٹس، اچانک حرکات (impulsive movement) اور گودام میں اشیاء کو ترتیب دینے کی مہارتوں پر مبنی مقابلے شامل ہیں۔
قبل ازیں، ان گیمز میں بیڈمنٹن، باسکٹ بال، ٹیبل ٹینس اور دیگر کھیلوں میں روبوٹس کی پرفارمنس پیش کی جا چکی ہے۔