برسلز، 4 جولائی، 2025 (وام)--یورپی کمیشن نے یورپی خطوں اور شہروں کو جدید نقل و حمل کے نظام سے بہتر انداز میں جوڑنے کیلئے 94 ٹرانسپورٹ منصوبوں کا انتخاب کیا ہے، جن پر "کنیٹنگ یورپ فیسلٹی" (CEF) کے تحت تقریباً 2.8 ارب یورو کی امداد فراہم کی جائے گی۔
یورپی کمیشن کے مطابق، یہ منصوبے ٹرانس-یورپین ٹرانسپورٹ نیٹ ورک (TEN-T) کے تحت ریلوے، داخلی آبی گزرگاہوں اور سمندری راستوں کو جدید بنانے میں مدد دیں گے۔ اس اقدام سے یورپی داخلی منڈی مزید مضبوط اور مقابلہ بازی کی حامل بنے گی، جبکہ شمال سے جنوب اور مشرق سے مغرب تک خطوں کے درمیان ربط بہتر ہوگا۔
حکام کا کہنا تھا کہ ریلوے کے شعبے کو سب سے زیادہ یعنی کل فنڈنگ کا 77 فیصد حصہ فراہم کیا جائے گا، جس کا مقصد بالخصوص کویژن ممالک میں'TEN-T' کے بنیادی اور توسیعی نیٹ ورکس میں اہم انفراسٹرکچر کو اپ گریڈ کرنا ہے۔ اس ضمن میں بالٹک خطے اور پولینڈ میں ریل بالٹیکا کی تعمیر اور یونان و سلوواکیہ میں ریلوے نظام کی بہتری شامل ہے۔ اس کے علاوہ چیکیا اور پولینڈ میں ہائی اسپیڈ ریل لائنز کی ترقی کا بھی اعلان کیا گیا ہے۔
مزید یہ کہ یورپی یونین کے 11 رکن ممالک – جن میں آسٹریا، جرمنی، ہنگری، اٹلی اور سویڈن شامل ہیں – میں 46 منصوبوں کے ذریعے یورپی ریل ٹریفک مینجمنٹ سسٹم (ERTMS) کو ریل گاڑیوں اور پٹریوں پر نافذ کیا جائے گا، جس سے سرحد پار ریل حفاظت اور ہم آہنگی میں بہتری آئے گی۔
یاد رہے کہ 'CEF' ٹرانسپورٹ پروگرام (2021-2027) کے تحت کُل 25.8 ارب یورو مختص کیے گئے ہیں، جو نہ صرف تمام یورپی یونین کے رکن ممالک بلکہ یوکرین اور مالدووا (CEF سے منسلک ممالک) میں بھی منصوبہ جات کی مالی معاونت کیلئے دستیاب ہیں۔ کمیشن کے مطابق، موجودہ منظوری کے بعد اس بجٹ کا 95 فیصد حصہ پہلے ہی مختص کیا جا چکا ہے۔
یورپی کمیشن نے بتایا کہ 2014 میں آغاز کے بعد سے اب تک کنیٹنگ یورپ فیسلٹی کے تحت 1,861 منصوبے (جن میں حالیہ 94 منصوبے بھی شامل ہیں) ٹرانسپورٹ کے شعبے میں مجموعی طور پر 47.34 ارب یورو کی امداد سے چلائے جا چکے ہیں۔