ریو ڈی جنیرو، 6 جولائی (وام)--متحدہ عرب امارات نے برازیل کے شہر ریو ڈی جنیرو میں ہونے والے برکس گروپ کے نیو ڈویلپمنٹ بینک (NDB) کے بورڈ آف گورنرز کی 10ویں سالانہ میٹنگ میں وزارتِ خزانہ کی نمائندگی میں شرکت کی۔
اس اجلاس کا مقصد بینک کی اب تک کی کارکردگی کا جائزہ لینا، مستقبل میں ادارے کی کارکردگی بہتر بنانے کے لیے اقدامات پر غور کرنا، اور بورڈ آف گورنرز سے متعلق اُمور پر مشاورت کرنا تھا۔
وزیر مملکت برائے مالی اُمور محمد بن ہادی الحسینی نے اجلاس سے خطاب کرتے ہوئے کہا کہ نیو ڈویلپمنٹ بینک نے مالیاتی سہولتوں میں تنوع پیدا کر کے نمایاں کامیابی حاصل کی ہے۔ انہوں نے اس بات پر بھی زور دیا کہ بینک میں نئے ارکان کی شمولیت سے ابھرتی معیشتوں کی بہتر نمائندگی ممکن ہو سکے گی۔
انہوں نے یو اے ای کی جانب سے برکس گروپ کی ترجیحات میں بھرپور تعاون اور رکن ممالک کے ساتھ شراکت داری کو مزید وسعت دینے کے عزم کا اعادہ کیا۔
یاد رہے کہ نیو ڈویلپمنٹ بینک 2014 میں برکس ممالک کی جانب سے قائم کیا گیا تھا اور تاحال 120 سے زائد منصوبوں کے لیے تقریباً 39 ارب امریکی ڈالر کی مالی منظوری دی جا چکی ہے۔