شارجہ، 10 جولائی، 2025 (وام) --محکمہ جائیداد رجسٹریشن شارجہ نے اپنی سرکاری ویب سائٹ (www.shjrerd.gov.ae) کے جدید ورژن کا اجراء کر دیا ہے، جس کا مقصد جائیداد سے متعلق خدمات کے معیار کو بہتر بنانا اور صارفین کو مکمل طور پر مربوط ڈیجیٹل تجربہ فراہم کرنا ہے۔
محکمے کے مطابق نئی ویب سائٹ جدید انٹرایکٹو ڈیزائن پر مبنی ہے جو ڈیجیٹل تبدیلی کے موجودہ تقاضوں سے ہم آہنگ ہے، اور سرمایہ کاروں و جائیداد سے متعلق فریقین کی ضروریات کو نہایت سہولت اور مؤثر انداز میں پورا کرتی ہے۔ یہ اقدام شارجہ حکومت کے وژن اور ہدایات کا عملی اظہار ہے، جس کا مقصد سمارٹ اور جدید خدمات فراہم کر کے ریئل اسٹیٹ مارکیٹ کی کشش کو بڑھانا اور پائیدار سرمایہ کاری کا ماحول تشکیل دینا ہے۔
محکمے کے ڈائریکٹر جنرل عبدالعزیز احمد الشامسی نے اس موقع پر کہا کہ، ’’نئی ویب سائٹ کا اجرا ہماری مکمل ڈیجیٹل تبدیلی کی راہ میں ایک اہم سنگِ میل ہے، جو اس بات کی عکاسی کرتا ہے کہ ہم مختلف صارفین — افراد، جائیداد ڈویلپرز، کمپنیاں، بینک، اور ہوم اونرز ایسوسی ایشنز — کو سمارٹ اور لچکدار خدمات فراہم کرنے کے لیے پرعزم ہیں۔ یہ شارجہ کو خطے کا ایک نمایاں جائیداد مرکز بنانے کی کوششوں کا حصہ ہے۔‘‘
نئی ویب سائٹ پر خدمات کو صارفین کی اقسام کے مطابق ترتیب دیا گیا ہے تاکہ مخصوص ضروریات کی تکمیل مؤثر انداز میں ہو سکے۔
نئی ویب سائٹ پر جائیداد سے متعلق مختلف شعبوں کے لیے مخصوص ڈیجیٹل خدمات دستیاب ہیں، جنہیں صارف کی نوعیت کے مطابق ترتیب دیا گیا ہے۔ ریئل اسٹیٹ ڈویلپرز کے لیے وہ تمام خدمات موجود ہیں جو ان کے منصوبہ جات سے متعلق اہم امور کو احاطہ کرتی ہیں، جن میں پراجیکٹ رجسٹریشن، ابتدائی سیلز کنٹریکٹس کی تصدیق، پراجیکٹس کی نگرانی، اور ہوم اونرز ایسوسی ایشن بنانے کی درخواستیں شامل ہیں۔ اسی طرح ہوم اونرز ایسوسی ایشنز کے لیے بھی متنوع خدمات دستیاب ہیں، جن میں انتظامی نگران کمپنی کی رجسٹریشن، بورڈ سرٹیفکیٹس کا اجرا، سروس و مینٹیننس فیس کی منظوری اور شکایات کا اندراج شامل ہے۔
علاوہ ازیں، سرکاری ادارے جائیداد کی ملکیت سے متعلق رپورٹس تک رسائی حاصل کر سکتے ہیں۔ عام افراد کے لیے ملکیتی خدمات، متبادل ٹائٹل ڈیڈ کا اجرا، قیمتوں کا تعین اور ملکیتی ڈیٹا کی تازہ کاری کی سہولیات فراہم کی گئی ہیں۔ بینکوں کے لیے بھی مخصوص ڈیجیٹل سروسز کا بندوبست کیا گیا ہے، جن میں رہن کی رجسٹریشن، رہن کی رہائی، اس میں اضافہ یا ترمیم شامل ہیں۔ یہ تمام خدمات صارفین کو ایک مربوط، ہموار اور سہل ڈیجیٹل تجربہ فراہم کرنے کے وژن کے تحت فراہم کی جا رہی ہیں۔