کیلیفورنیا، 18 جولائی، 2025 (وام) -- امریکہ کی معروف رائیڈ شیئرنگ کمپنی اوبر نے اعلان کیا ہے کہ وہ آئندہ چھ برسوں کے دوران کم از کم 20,000 روبوٹیکسیز متعارف کرانے کا منصوبہ رکھتی ہے۔
کمپنی کے مطابق، یہ خودکار ٹیکسیاں امریکی الیکٹرک گاڑیاں تیار کرنے والی کمپنی لوسِڈ (Lucid) کے SUV ماڈلز پر مشتمل ہوں گی، جنہیں نیوُرو (Nuro) نامی اسٹارٹ اپ کی تیار کردہ خودکار ڈرائیونگ ٹیکنالوجی سے لیس کیا جائے گا۔
اوبر کی جانب سے جاری بیان میں وضاحت کی گئی ہے کہ یہ گاڑیاں یا تو خود کمپنی کی ملکیت ہوں گی یا اس کے تیسرے فریق پارٹنرز کے ذریعے چلائی جائیں گی، اور انہیں صرف اوبر پلیٹ فارم کے ذریعے صارفین کے لیے دستیاب کیا جائے گا۔
ٹیکنالوجی کے اس نئے دور میں اوبر نے خود کو روبوٹیکسی خدمات کا عالمی رہنما بنانے کی خواہش کا اظہار پہلے ہی کر چکا ہے۔ کمپنی جرمن کار ساز ادارے ووکس ویگن اور گوگل کی پیرنٹ کمپنی الفابیٹ کی ذیلی کمپنی وے مو (Waymo) کے ساتھ بھی شراکت داری کے معاہدے کر چکی ہے۔
فی الحال امریکہ کے کچھ شہروں میں وے مو کی خودکار گاڑیاں اوبر کے پلیٹ فارم پر سفر کے لیے دستیاب ہیں، جبکہ ووکس ویگن کی روبوٹیکسیز بھی جلد اس سروس کا حصہ بننے والی ہیں۔
رواں ہفتے اوبر نے ایک اور بین الاقوامی قدم اٹھاتے ہوئے چینی خودکار ڈرائیونگ کمپنی "مومینٹا" (Momenta) کے ساتھ نئی شراکت داری کا اعلان کیا ہے، جس کا مقصد امریکہ اور چین سے باہر خودکار سفری خدمات متعارف کرانا ہے۔