ابوظہبی، 27 جولائی 2025 (وام)--متحدہ عرب امارات کی وزیر مملکت نوریہ الکعبی سے پاپوا نیو گنی کے وزیر برائے بین الاقوامی تجارت و سرمایہ کاری رچرڈ مارو نے ابوظہبی میں ملاقات کی۔ یہ ملاقات رچرڈ مارو کے سرکاری دورۂ امارات کے موقع پر عمل میں آئی۔
ملاقات میں دونوں ممالک کے درمیان تجارتی، سیاحتی اور سرمایہ کاری کے شعبوں میں تعاون کو فروغ دینے کے امکانات پر تفصیلی تبادلہ خیال کیا گیا۔ فریقین نے باہمی دلچسپی کے امور پر گفتگو کرتے ہوئے دو طرفہ تعلقات کو مزید وسعت دینے کی خواہش ظاہر کی۔
اس موقع پر دونوں رہنماؤں نے عوامی روابط کو مستحکم بنانے اور ثقافتی تبادلوں کو فروغ دینے کی اہمیت پر بھی زور دیا تاکہ دونوں اقوام کے درمیان ہم آہنگی اور باہمی فہم و فراست کو تقویت دی جا سکے۔
رچرڈ مارو نے متحدہ عرب امارات کے ساتھ بڑھتے ہوئے تعلقات پر اطمینان کا اظہار کرتے ہوئے کہا کہ ان کا ملک امارات کے ساتھ اقتصادی و تجارتی تعاون کو مزید وسعت دینے کا خواہاں ہے تاکہ دونوں ممالک باہمی مفادات کے حصول کی جانب پیش قدمی کر سکیں۔
ملاقات کے دوران سیاسی، اقتصادی، اور عوامی سفارتکاری کو فروغ دینے کے حوالے سے بھی مشترکہ عزم کا اعادہ کیا گیا، جسے دونوں ملکوں کی مشترکہ خوشحالی کے لیے ایک اہم پیش رفت قرار دیا گیا۔
اس موقع پر وزیر خارجہ برائے کیریبین اور پیسیفک ریاستوں کے خصوصی ایلچی عمر شہادے بھی نوریہ الکعبی کے ہمراہ موجود تھے۔