شنگھائی، 5 اگست 2025 (وام)--متحدہ عرب امارات کے نیشنل میڈیا آفس اور میڈیا کونسل کے چیئرمین، عبداللہ بن محمد بن بُطی الحیمد نے شنگھائی کا ایک اہم دورہ کیا، جہاں انہوں نے شنگھائی یونائیٹڈ میڈیا گروپ (SUMG) اور شنگھائی میڈیا گروپ (SMG) کے سینئر رہنماؤں سے ملاقاتیں کیں۔
یہ ملاقاتیں بریج روڈ شو کے شنگھائی مرحلے کے دوران ہوئیں، جو کہ رواں سال دسمبر میں ابوظہبی میں ہونے والے بریج 2025 سمٹ کی تیاری کا حصہ ہے۔ یہ سمٹ دنیا بھر کے میڈیا، ثقافتی اور تخلیقی شعبے کے ماہرین، فیصلہ سازوں اور اداروں کو ایک پلیٹ فارم پر جمع کرے گا تاکہ ابلاغ کے مستقبل کی نئی جہتوں کا تعین کیا جا سکے۔
عبداللہ الحیمد اور بریج وفد کا استقبال شنگھائی میڈیا گروپ کے صدر فینگ شی ژونگ اور دیگر اعلیٰ حکام نے کیا، جن میں ریسرچ و ٹیکنالوجی کے ڈائریکٹر اور ڈیجیٹل پلیٹ فارمز کے سربراہ بھی شامل تھے۔ اس دوران وفد نے شنگھائی میڈیا گروپ کے ہیڈکوارٹر کا دورہ کیا اور جدید اسٹوڈیوز، نیوز رومز، فیکٹ چیکنگ یونٹس اور ڈیجیٹل لیبارٹریز کا مشاہدہ کیا۔
الحیمد نے اس موقع پر چین کے کردار کو عالمی میڈیا آڈیئنس تک رسائی اور جدید اختراعات کے تناظر میں "مرکزی حیثیت" قرار دیا۔ ان کا کہنا تھا کہ متحدہ عرب امارات کی حکمت عملی، جس کا مقصد خود کو عالمی میڈیا مرکز بنانا ہے، ایسے شراکتی اقدامات سے مزید مستحکم ہو گی۔ انہوں نے کہا کہ دونوں ممالک کی مشترکہ صلاحیتیں — خصوصاً میڈیا ٹیکنالوجیز، حقائق پر مبنی صحافت، اور ڈیجیٹل پلیٹ فارمز — ایسے مواد کی تخلیق میں مدد دیں گی جو مغربی ایشیا، چین اور دیگر خطوں میں مؤثر ثابت ہو سکے۔
انہوں نے مزید کہا کہ یو اے ای اور چین کے تعلقات باہمی احترام اور مشترکہ وژن پر مبنی ہیں، جنہیں اماراتی قیادت کی مکمل حمایت حاصل ہے۔ یہ تعاون صرف میڈیا ہی نہیں بلکہ دیگر کلیدی شعبوں میں بھی پل بنانے کی پالیسی کی عکاسی کرتا ہے۔
عبداللہ الحامد نے واضح کیا کہ بریج روڈ شو کا یہ مرحلہ چینی میڈیا اداروں کے ساتھ تعاون کو فروغ دینے، علم و تجربے کے تبادلے کو فعال بنانے، اور مواد کی تیاری، ڈیجیٹل پلیٹ فارمز کی ترقی اور مصنوعی ذہانت کے انضمام جیسے میدانوں میں شراکت کو وسعت دینے کی ایک مربوط کوشش ہے۔
اپنے اختتامی بیان میں انہوں نے کہاکہ، "متحدہ عرب امارات میڈیا کو نہ صرف شعور اجاگر کرنے بلکہ رواداری اور کشادگی جیسے اقدار کے فروغ کا ایک مؤثر ذریعہ سمجھتا ہے۔ میڈیا کو ہم پائیدار ترقی کے سفر میں ایک کلیدی شراکت دار کے طور پر دیکھتے ہیں۔ یہی وژن ہمیں دنیا کے معروف میڈیا اداروں کے ساتھ اسٹریٹجک شراکت داری قائم کرنے کی ترغیب دیتا ہے، تاکہ ایسا مواد تخلیق کیا جا سکے جو ذمہ دار، مستقبل بین اور تیزرفتار ڈیجیٹل دنیا کا حقیقی عکاس ہو۔"
دوسری جانب، شنگھائی میڈیا گروپ کے صدر فینگ شی ژونگ نے چین–یو اے ای میڈیا و ثقافتی تعاون کو دیرپا قرار دیا اور کہا کہ ٹیکنالوجی اور میڈیا کے انضمام کے اس نئے دور میں عالمی شراکت داری کو مزید مضبوط بنانا وقت کی ضرورت ہے۔
بریج وفد نے شنگھائی یونائیٹڈ میڈیا گروپ کا بھی دورہ کیا، جہاں ان کا استقبال صدر لی یُن نے کیا۔ وفد کو بتایا گیا کہ یہ ادارہ 2013 سے اخباری اداروں کو جدید ڈیجیٹل میڈیا سروسز فراہم کر رہا ہے، اور یہ شنگھائی میونسپل کمیٹی کے تحت کام کرتا ہے۔
یہ تمام سرگرمیاں بریج 2025 سمٹ سے قبل بین الاقوامی میڈیا تعاون کو وسعت دینے کے مشن کا حصہ ہیں، جو متحدہ عرب امارات کے اس عزم کی غمازی کرتی ہیں کہ وہ ذمہ دارانہ مواد، اختراعی ٹیکنالوجی اور عالمی سطح پر شراکتی ابلاغی نظام کے فروغ کے لیے قائدانہ کردار ادا کرنا چاہتا ہے۔