ابوظہبی، 4 نومبر، 2025 (وام)--مرکنٹائل اینڈ میری ٹائم گروپ کا حصہ مینا بایو فیولز نے فجیرہ آئل انڈسٹری زون (FOIZ) میں متحدہ عرب امارات کی پہلی پائیدار ہوابازی ایندھن (Sustainable Aviation Fuel – SAF) کی تیاری کے منصوبے پر عمل درآمد شروع کیا ہے۔ یہ اقدام ’پائیدار ہوابازی ایندھن روڈ میپ 2030‘ اور ’نیٹ زیرو 2050 ایجنڈا‘ کے اہداف کی سمت ایک بڑا قدم ہے۔
یہ منصوبہ استعمال شدہ خوردنی تیل اور فضلے پر مبنی خام مواد کو بین الاقوامی معیار کے مطابق تصدیق شدہ ہوابازی ایندھن (SAF) میں تبدیل کرے گا۔
پہلا مرحلہ سالانہ 12 کروڑ 50 لاکھ لیٹر ایندھن تیار کرے گا، جو یو اے ای کے 2030 ہدف کا تقریباً 18 فیصد ہے، جبکہ دوسرے مرحلے میں پیداوار بڑھا کر سالانہ 25 کروڑ لیٹر کی جائے گی، جو قومی ہدف کا 36 فیصد حصہ مکمل کرے گی۔
منصوبے پر کل سرمایہ کاری 300 ملین امریکی ڈالر متعین کی گئی ہے۔
گزشتہ ایک سال کے دوران، مینا بایو فیولز نے منصوبے کو تصور سے عمل درآمد کے مرحلے تک پہنچایا۔ اس دوران قابلِ عملیت کے مطالعات مکمل کیے گئے، فجیرہ حکومت سے مینا ٹرمینلز کے قریب زمین حاصل کی گئی، اور ڈائناٹرون FZE کو پروجیکٹ مینیجر کے طور پر مقرر کیا گیا۔
کمپنی نے سروے مکمل کرنے کے ساتھ ایک عالمی ٹیکنالوجی فراہم کنندہ کا بھی انتخاب کیا ہے جو فضلے پر مبنی خام مواد کو پائیدار ایندھن میں تبدیل کرے گا۔
ایڈیپک 2025 کے دوران، کمپنی نے ایمارات پٹرولیم کمپنی (Emarat) کے ساتھ حکمتِ عملی پر مبنی آف ٹیک مفاہمتی یادداشت پر دستخط کیے، جس کی تقریب میں وزیرِ توانائی و انفراسٹرکچر سہیل بن محمد الفرزی المزروعی بھی موجود تھے۔
مزید ایک مفاہمتی یادداشت دبئی ایئر شو کے دوران دستخط کے لیے طے کیا گیا ہے۔
ایمارات پٹرولیم کمپنی کے چیف ایگزیکٹو آفیسر علی خلیفہ الشامسی نے کہا کہ یہ شراکت پائیدار ہوابازی ایندھن کے مقامی نظام کے قیام میں ایک اہم سنگِ میل ہے۔
ان کا کہنا تھا کہ، “مینا بایو فیولز کے ساتھ یہ معاہدہ صرف نیت نہیں بلکہ سپلائی کو حقیقت میں بدلنے کا قدم ہے، جو مقامی سطح پر تیار کردہ مصدقہ ایندھن فراہم کر کے ائرلائنز کے کاربن اخراج میں کمی میں مدد دے گا۔”
انہوں نے مزید کہا کہ، “یہ منصوبہ روزگار، مہارت اور اقتصادی قدر کو یو اے ای کے اندر برقرار رکھتے ہوئے ملک کے ’نیٹ زیرو 2050‘ کے ہدف کی سمت پیشرفت کو تیز کرتا ہے۔”
کیپٹن سالم الافخم، ڈائریکٹر فجیرہ آئل انڈسٹری زون نے اس منصوبے کو فجیرہ اور یو اے ای دونوں کے لیے تاریخی سنگِ میل قرار دیا۔
انہوں نے کہا کہ یہ منصوبہ توانائی کے تنوع میں اضافہ کرے گا اور FOIZ کو پائیدار ایندھن کے ایک مربوط توانائی مرکز میں تبدیل کرنے میں مدد دے گا۔
محمد سعید الرقبانی، چیئرمین مینا بایو فیولز نے کہا کہ منصوبے کا تیز رفتار آغاز کمپنی کے پائیداری کے قومی اہداف کے ساتھ مکمل عزم کا مظہر ہے۔
جبکہ سی ای او مینا بایو فیولز گاٹی الجبوری نے کہا کہ کمپنی فجیرہ کے اسٹریٹجک انفراسٹرکچر سے فائدہ اٹھاتے ہوئے خود کو علاقائی سطح پر صاف ہوابازی ایندھن کی پیداوار میں رہنما کے طور پر مستحکم کرنا چاہتی ہے۔