ابوظہبی، 12 نومبر، 2025 (وام) --دنیا بھر کے پالیسی سازوں، تخلیقی رہنماؤں اور اختراعی ماہرین پر مشتمل ایک نیا عالمی اتحاد “بریج الائنس (BRIDGE Alliance)” متحدہ عرب امارات میں قائم کیاگیا ہے، جس کا مقصد میڈیا، تفریحی صنعت اور تخلیقی معیشت میں شمولیت، سرمایہ کاری اور پائیدار ترقی کو فروغ دینا ہے۔
یہ ادارہ اپنی نوعیت کا پہلا بین الاقوامی پلیٹ فارم ہے، جس کا صدر دفتر متحدہ عرب امارات میں واقع ہے۔ عبداللہ بن محمد بن بُطی الحمید اس کے چیئرمین ہیں، جبکہ اس کی گورننگ بورڈ میں سابق سربراہانِ مملکت، عالمی قائدین، پالیسی ساز اور میڈیا و ٹیکنالوجی کے شعبے سے تعلق رکھنے والی نمایاں شخصیات شامل ہیں۔
یہ آزاد اور مشن پر مبنی عالمی تنظیم اپنے تمام آپریشنل منافع کو تحقیق، استعداد سازی اور اختراع کے فروغ میں دوبارہ سرمایہ کاری کرتی ہے۔ اس کا مقصد مختلف شعبوں میں تعاون، خیالات، سرمائے اور تخلیقی صلاحیتوں کے مؤثر تبادلے کو ممکن بنانا ہے۔
اس موقع پر عبداللہ بن بُطی الحمید نے کہاکہ، “بریج الائنس متحدہ عرب امارات میں جنم لینے والا ایک انسانی و معاشی منصوبہ ہے، جس کا مقصد میڈیا، معاشرے اور معیشت کے باہمی تعلق کو نئے انداز میں متعین کرنا ہے۔ یہ اقوام کے درمیان سمجھ بوجھ، اثر انگیزی اور ترقی کے پل تعمیر کرے گا۔”
انہوں نے مزید کہا کہ بریج الائنس ایک عالمی ماحولیاتی نظام ہے جو تعاون، اختراع اور مشترکہ ذمہ داری کی بنیاد پر قائم ہے، جہاں مہارتیں خیالات کو اثر میں، اور شراکت داریوں کو ترقی میں تبدیل کرتی ہیں۔
الائنس کی پہلی بڑی سرگرمی “بریج سمٹ 2025” ہوگی، جو 8 سے 10 دسمبر تک ابوظہبی نیشنل ایگزیبیشن سینٹر (ایڈنیک) میں منعقد ہو گی۔ یہ دنیا کا سب سے بڑا افتتاحی میڈیا ایونٹ ہوگا، جس میں 60 ہزار شرکاء، 400 مقررین اور 300 نمائش کنندگان سات موضوعاتی شعبوں جیسے میڈیا، کری ایٹر اکانومی، میوزک، گیمنگ، ٹیکنالوجی، مارکیٹنگ اور پکچر میں شرکت کریں گے۔
متحدہ عرب امارات میں قائم بریج الائنس عالمی سطح پر اختراع، تعاون اور ذمہ دار میڈیا ترقی کا مرکز بننے جا رہا ہے، جو امارات کے کردار کو تخلیقی خیالات، ثقافتی تبادلے اور اجتماعی ترقی کے ایک عالمی مرکز کے طور پر مزید مضبوط کرے گا۔
بانی بورڈ میں نمایاں شخصیات شامل ہیں جن میں روتانا میڈیا گروپ کی سی ای او اور الولید فلاحیات کی سیکریٹری جنرل شہزادی لمیاء بنت ماجد السعود، سینیگال کے سابق صدر میکی سال، بریج الائنس کے نائب چیئرمین ڈاکٹر جمال محمد عبید الکعبی، ٹائم میگزین کی سی ای او جیسیکا سبلی، اکیڈمی آف موشن پکچر آرٹس اینڈ سائنسز کی سابق صدر جینٹ یانگ، افریقہ لیڈرشپ اینڈ ڈائیلاگ انسٹی ٹیوٹ کی سی ای او ڈاکٹر جولی گچورو، یانگو گروپ کے سی ای او دانیل شولیئیکو، انٹرٹینمنٹ میڈیا وینچرز کے بانی سینفورڈ کلیمن، عالمی اسٹریٹجسٹ رچرڈ اتیاس، اور بریج الائنس کی منیجنگ ڈائریکٹر مریم بن فہد شامل ہیں۔