ابوظہبی، 18 نومبر، 2025 (وام)--متحدہ عرب امارات کے صدر عزت مآب شیخ محمد بن زاید النہیان نے آج جنوبی کوریا کے صدر لی جے میونگ کا سرکاری دورے پر امارات آمد پر خیرمقدم کیا۔
کوریا کے صدر کی ابوظہبی آمد پر قصر الوطن میں شاندار سرکاری استقبالیہ تقریب منعقد ہوئی۔ شیخ محمد بن زاید انہیں اعزازی اسٹیج تک لے گئے جہاں دونوں ممالک کے قومی ترانے بجائے گئے، 21 توپوں کی سلامی دی گئی اور اعزازی گارڈ نے سلامی پیش کی۔
جب کورین صدر کا موٹرکیڈ قصر الوطن کے صحن میں داخل ہوا تو یو اے ای ائیر فورس کی ایروبٹک ٹیم ’الفرسان‘ نے ان کے اعزاز میں فضائی مظاہرہ کیا اور کورین پرچم کے رنگوں کے دھوئیں کے ساتھ شاندار فلائی پاسٹ پیش کیا۔
اس موقع پر اماراتی لوک فنون کے گروپوں نے روایتی رقص اور نغمے پیش کیے، جبکہ گھوڑوں اور اونٹوں کی پریڈ نے مہمانِ خصوصی کا پُرجوش استقبال کیا۔ راستے پر کھڑے بچوں نے دونوں ممالک کے پرچم لہرا کر کورین صدر کے لیے گرمجوشی کا اظہار کیا۔
صدر لی جے میونگ کا استقبال اعلیٰ شخصیات نے کیا جن میں نائب صدر، نائب وزیر اعظم اور صدارتی دیوان کے چیئرمین عزت مآب شیخ منصور بن زاید النہیان؛ ولی عہد ابوظہبی عزت مآب شیخ خالد بن محمد بن زاید النہیان؛ نائب وزیراعظم اور وزیر داخلہ عزت مآب لیفٹیننٹ جنرل شیخ سیف بن زاید النہیان؛ ڈپٹی چیئرمین پریزیڈینشل کورٹ برائے ڈویلپمنٹ و شہداء امور عزت مآب شیخ ذیاب بن محمد بن زاید النہیان؛ صدارتی دیوان برائے خصوصی امور کے نائب چیئرمین عزت مآب شیخ حمدان بن محمد بن زاید النہیان؛ اور یو اے ای صدر کے مشیر شیخ محمد بن حمد بن تحنون النہیان سمیت وزرا اور سینئر حکام شامل تھے۔