ابوظہبی، 19 نومبر، 2025 (وام) --متحدہ عرب امارات نے سنگاپور میں منعقد ہونے والے فیوچر ٹریڈ اینڈ انویسٹمنٹ پارٹنرشپ (FTIP) کے پہلے وزارتی اجلاس میں کھلی، اصولوں پر مبنی بین الاقوامی تجارت کی قیادت کے اپنے عزم کو ایک بار پھر دہرایا۔ یہ شراکت داری ستمبر 2025 میں قائم کی گئی تھی، جس کا مقصد کھلی اور منصفانہ تجارت کو فروغ دینا، جامع ترقی کی حمایت کرنا اور جدید دور کے تجارتی چیلنجز سے نمٹنا ہے۔
اجلاس کے دوران نئے رکن ممالک پیراگوئے اور ملائیشیا کو خوش آمدید کہا گیا، جس سے فیوچر ٹریڈ اینڈ انویسٹمنٹ پارٹنرشپ کے رکن ممالک کی مجموعی تعداد 16 ہو گئی۔ اجلاس میں سپلائی چین کے استحکام کو بڑھانے، ڈیجیٹل اور پیپر لیس ٹریڈ کو فروغ دینے، اصولوں پر مبنی تجارتی نظام کو مزید مضبوط بنانے اور تجارتی مسائل کے حل کے لیے ٹیکنالوجی کے مؤثر استعمال سے متعلق نئی پہلوں کا آغاز بھی کیا گیا۔
متحدہ عرب امارات کی جانب سے وزیر مملکت برائے خارجہ تجارت ڈاکٹر ثانی بن احمد الزیودی نے اجلاس میں شرکت کی اور بین الاقوامی تجارت کے فروغ کے لیے یو اے ای کے کردار اور عزم پر روشنی ڈالی ہے۔