قاہرہ، 21 جنوری، 2026 (وام) -- مصر کی وزارت پیٹرولیم و معدنی وسائل نے اعلان کیا ہے کہ خلیجِ سویز میں واقع نارتھ صفا آئل فیلڈ میں ایک نئے ترقیاتی کنویں سے تیل و گیس کی پیداوار کا باقاعدہ آغاز کر دیا گیا ہے، جسے گلف آف سویز پیٹرولیم کمپنی آپریٹ کر رہی ہے۔
وزارت کی جانب سے منگل کو جاری بیان کے مطابق الوسل-4 کنواں یومیہ تقریباً 2 ہزار 250 بیرل خام تیل اور قریب 13 لاکھ مکعب فٹ گیس پیدا کر رہا ہے، جس کے بعد کمپنی کی مجموعی پیداوار بڑھ کر تقریباً 65 ہزار بیرل خام تیل یومیہ تک پہنچ گئی ہے۔ وزارت نے واضح کیا کہ الوسل-4 کنواں کمپنی کے 2026 کے ترقیاتی منصوبے کا اہم حصہ ہے۔
بیان میں مزید کہا گیا کہ نارتھ صفا فیلڈ خلیجِ سویز کی نمایاں ترین دریافتوں میں شمار ہوتا ہے، جو 2024 میں پیداوار کے مرحلے میں داخل ہوا تھا۔ فیلڈ کی ترقی کا عمل بدستور جاری ہے، جس کے تحت ایک آف شور پروڈکشن پلیٹ فارم کی تنصیب اور تین کنوؤں میں پانی کے انجیکشن پروگرام پر عمل درآمد کیا جا رہا ہے، تاکہ پیداوار میں اضافہ کیا جا سکے اور فیلڈ کی ترقی کے دوسرے مرحلے کی تیاری مکمل کی جا سکے۔