روم، 29 جنوری، 2026 (وام) --اٹلی میں شدید طوفانوں کے نتیجے میں جزیرہ سسلی کے شہر نیشیمی میں لینڈ سلائیڈنگ کا واقعہ پیش آیا، جس سے تاریخی علاقے کے کئی حصے تباہ ہو گئے اور متعدد مکانات کھڑی چٹان کے کنارے معلق ہو کر رہ گئے۔
سرکاری بیان کے مطابق تقریباً 25 ہزار آبادی پر مشتمل یہ شہر ایک سطح مرتفع پر واقع ہے جو بارشوں کے باعث بیٹھنا شروع ہو گیا، جس کے نتیجے میں 1,500 سے زائد افراد کو حفاظتی اقدام کے طور پر اپنے گھروں سے منتقل ہونا پڑا۔ اٹلی کی سول پروٹیکشن ایجنسی نے بتایا کہ 16 سے 25 جنوری کے دوران موسلا دھار بارش کے باعث دو علیحدہ لینڈ سلائیڈنگز ہوئیں، جنہوں نے شہر کے مختلف حصوں کو متاثر کیا۔
ایجنسی کے مطابق ان واقعات کے نتیجے میں مقامی سڑکوں کا نظام، عمارتیں اور بنیادی خدمات شدید متاثر ہوئیں۔ اس دوران 120 کلومیٹر فی گھنٹہ تک تیز ہوائیں چلتی رہیں جبکہ سمندری لہروں کی بلندی 8 سے 9 میٹر تک ریکارڈ کی گئی، جس سے سسلی، کلیبریا اور سارڈینیا کے علاقوں میں صورتحال مزید سنگین ہو گئی۔
رپورٹ کے مطابق بعض ساحلی شہروں میں سمندر کنارے قائم پورے راستے بہہ گئے جبکہ دیگر انفراسٹرکچر کو بھی نمایاں نقصان پہنچا۔ سسلی گزشتہ ہفتے آنے والے شدید طوفان، جسے سائیکلون ہیری کا نام دیا گیا، سے خاص طور پر شدید متاثر ہوا۔