ابوظہبی، 10 فروری، 2026 (وام) --متحدہ عرب امارات کے صدر عزت مآب شیخ محمد بن زاید النہیان اور جمہوریہ فن لینڈ کے صدر الیگزینڈر سٹب کے درمیان آج ٹیلیفونک گفتگو ہوئی، جس میں دونوں ممالک کے باہمی تعلقات اور تعاون کے فروغ پر تبادلہ خیال کیا گیا۔
گفتگو کے دوران دونوں رہنماؤں نے دوطرفہ تعلقات کو مزید مستحکم بنانے کے عزم کا اعادہ کیا، بالخصوص معیشت، تعلیم، جدید ٹیکنالوجی، مصنوعی ذہانت، خلائی تحقیق، جدت طرازی اور پائیداری جیسے ترجیحی شعبوں میں تعاون کو وسعت دینے پر اتفاق کیا۔
دونوں صدور نے باہمی دلچسپی کے علاقائی اور عالمی امور پر بھی تبادلہ خیال کیا، جن میں مشرق وسطیٰ کی تازہ ترین صورتحال شامل ہے۔ اس موقع پر علاقائی اور بین الاقوامی سطح پر امن و استحکام کے قیام اور تنازعات کے حل کے لیے مکالمے اور سفارت کاری کی اہمیت پر زور دیا گیا، جو دونوں ممالک کے امن، تعاون اور ترقی کے مشترکہ وژن سے ہم آہنگ ہے۔